【曾智華專欄】有市場，有人搶

年輕打工仔有自信，絕對好事，但不少過咗火，變「志大才疏」，而就算有才，也不懂得有步驟去顯露，結果跑輸同儕。

昔日管理香港電台第二台，年輕人電台，當然鼓勵創意與膽識。但個別年輕同事誤會乜叫膽識，以為拍吓心口亂來就叫膽識。

試過幾次啼笑皆非。其中一次最經典，遇上毫無分寸者，拍門直闖我辦公室就話：「碌Sir，你畀我同你拍檔做《晨光第一線》啦，肯定表現會好過車淑梅！」

我好認真咁矋住佢問：「請問你憑乜？」佢即時啞咗⋯⋯口窒窒：「我年輕，有新意，有衝勁，唔怕捱，只要有機會，就會表現你睇！」其時這位年輕人只在做三線時間（即冇乜聽眾，錯咗冇人知，最佳用來訓練新人）。

「XXX，用足球比喻，你只是丙組仔。《晨光第一線》係打英超，你現今連丙組都踢到普普通通，竟夠膽要求踢英超？仲話會勁過車淑梅？究竟你屋企有冇鏡？冇？我送塊鏡畀你好唔好？」

做電台，除非在外邊已屬勁人猛人，否則，所有主持皆由基層做起。當你有表現，自然有人賞識，可能外邊挖角，可能內部提升，一切皆無符碌也。

今日諗起個儍吓儍吓DJ，因昨晚與《過時．過節》導演曾慶宏晚飯，講到做新導演的坎坷。電影圈，大量人發夢做導演，但拍套戲，最少幾百萬元，若你冇好業績，邊個敢信你？試過有投資者以為識寫影評者，應拍得出好電影，結果蝕到攤攤腰。

曾慶宏犀利，一方面游說到電影發展基金資助，再加自己投資才掂。

現實社會，你一套掂，有市場，自然有人送錢上門，請你拍第二套。下一套，不用再小本製作（打丙組）了，佢可會挑戰「英超」呢？