陳奕迅演唱會丨六度Encore簽謝觀眾 Eason誤當手幅相是鄭欣宜：Oh my gosh！
陳奕迅（Eason）27場《FEAR and DREAMS》演唱會昨晚在紅館舉行尾場，演唱會上，Eason一如以往地以歌會友，在唱完《我們萬歲》後，Eason眼見觀眾反應熱烈，搞到他亦被感動到眼濕濕説：「最想講一句，今晚每一位觀眾，衷心多謝你。」講完他便向觀眾鞠躬，當Eason打算走到台後飲水，此時台下忽然響起哨子聲，嚇到Eason即擰轉頭問觀眾：「小息完咗？係咪我阿媽？佢好鍾意帶哨子出街！」
【相關文章】：
陳奕迅演唱會丨Eason激罕現場唱《大個女》女兒康堤感動淚崩紅館
【點擊睇陳奕迅演唱會尾場精彩片段】：
當歌迷舉起準備了有他樣子的手幅，他即問：「係咪自己買？咁破費呀？」不過當Eason走近台前看時竟將自己誤當成是鄭欣宜，非常搞笑，而眼見歌迷如此有心，令他也不禁大叫了三聲：「Oh my gosh！多謝你哋，好震撼，好想拍低佢！」而此時全場開始合唱《天下無雙》，他笑說：「一人一啖口水我都浸親，我聽你哋唱歌，但我唔會畀番錢你，講笑啫，你知我冇句真！」之後全場再次唱出《天下無雙》，而Eason此時再次被感動到眼紅紅的他亦加入一起唱，唱完更分別向著三面台觀眾作90度鞠躬致謝，之後他亦有在台上跪謝樂隊，而一向嚴守防疫措施的他，後來亦有在台上與舞蹈員逐一擁抱。
Encore 環節，Eason先唱出《人阿人》及《暴殄天物》等歌曲，唱完後笑指大家不用叫，因為他已安排好，之後便唱出當年寫給康堤的《大個女》，搞到女兒感動到喊。唱完《單車》後，Eason亦向音樂人致敬，並指若沒有他們，演唱會就會變成「Talk show」，而Eason全晚共Encore了六首歌，在唱出《歌·頌》後，個唱最終在12點前完場。
Eason在完騷後接受訪問時提到多次被感動到眼濕濕，他即笑指不記得，並表示好感動可以完成今次的演唱會，皆因前幾天喉嚨腫得很厲害：「我今朝仲驚緊，尋晚瞓唔到，今朝七點先瞓，好在瞓得好，今日好好彩，之前都擔心衰收尾，今日（狀態）ok，綵排時有啲火，把聲唔係好沙，鬆咗一口氣，人大咗好容易喊。」他指完成個唱後將休息個多月，稍後便會到馬來西亞、新加坡及台灣做巡迴演唱會，而現時最想做的就是食火鍋。
【點擊睇陳奕迅演唱會尾場嘉賓】：
談到唱《大個女》時，康堤忍不住喊，他指囡囡很感性，問到是否似他，他笑說：「我好少喺人面前喊，我只係帶歡樂同憤怒畀大家，好開心大家仲係咁踴躍，我一直都驚，以前要唱歌又要講嘢，不過今次好大膽，連唱咗29首歌先講嘢，其實都可以唔講，但忍唔住。」再問他演出時自爆腳腫，Eason表示因減磅太快致沒有脂肪支撐膝蓋，雖然演出時腳部仍酸痛，但上到台後腎上腺飆升便忘記腳痛。
至於為了做好防疫工作而住在酒店個多月的Eason，笑指已習慣住酒店，可能會住到不想歸家：「一個人住酒店好正，因為我鍾意洗嘢！」而他又自爆老婆與女兒因做了核酸，故開騷前已跟兩人擁抱，問到若開騷期間確診，會否有另外計劃？他說：「冇，舞蹈員同樂隊就有Plan B，我身邊所有人都中過，我都無中過，就知道我有幾多朋友同幾宅。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
