【曾智華專欄】請問先生做盛行？

二○○○年前，香港政壇其實好好玩，尤其上世紀八十年代至回歸前，雖則立法會內政治意識形態分明，但議員各種水平（IQ、AQ、EQ、素養、學識，以至幽默感）皆
比現在的高。政黨頭頭亦識英雄重英雄，雖則議會內針鋒相對，但私底下友誼不淺，經常一同吃飯、郊遊，甚至搓麻將，並沒甚麼你死我亡心態。
　　
小弟亦曾組織多次香港電台活動，搵齊三位政黨頭頭（政壇大佬）——李鵬飛、李柱銘及曾鈺成，不但共襄善舉，更曾三位一體到《十大中文金曲頒獎禮》，共同頒一個獎。
　　
昔日的政治，講尊重，講包容，講融和。隨着歷史的演變，俱往矣。今時今日，仍有幽默感的政治人物，少之又少。
　　
當中佼佼者又政治智慧特高的，為今屆退出政壇的石禮謙。「肥石」加入議會時，已從正職退休，五十五歲，故此，再加二十一年議會生涯，今天已七十七歲。
　　
佢有閱讀報章習慣，故間中會瞄到本欄，尤其觸及政治的，更會先睹為快。上周晚飯，拉我笑嘻嘻講：「肥碌，你最近提及今屆立法會議員，絕大部分冇人識。這個……我也有個尷尬經驗，講出嚟真係瘀到痹㗎！」
　　
話說早前有個飯局，剛剛有位陌生男子坐在石禮謙旁邊，基於禮貌，當然互相介紹啦。對方伸出手相握：「石議員，你好！」
　　
「肥石」又如何？見到對方個名牌，照讀：「XXX先生，你好！係呢，請問閣下做盛行的呢？」對方有少少尷尬、少少面紅，音量調低話：「立法會議員！」
　　
哦哦哦……點落台呢今勻？
　　
「肥石」乃政壇開心果，擅長棟篤笑。繼續開開心心話：「肥碌，眾所周知我乃立法會『波仔王』（通過N次），真係隨時瓜得㗎。所以，每朝瞓醒發覺在生，必定立即伏低祈禱感恩，高唱Hallelujah！大家飲杯！」