【曾智華專欄】「白宮」會員

香港，有無數咁多會所，由低檔的不少在單幢舊樓的「乜乜物物會所」，到高檔次的「非富則貴會所」，都有其客路及身分象徵。
　　
我不少老友名牌大學畢業後（小弟讀三級大學，絕不名牌），一係加入政府做高官，其他的，若從商，必定選英資國際大集團。
　　
過五關斬六將後，若獲取錄，等於開咗道通往上流社會的大門。集團政策，全力栽培你成為未來大班級人馬，首先要Mode你的外形及價值觀。外形方面，由頭到腳歐洲名牌，唔識著就由專人教你點樣Dress To Success。另外，人事部又會搵你，遞上大量入會表格任揀，包括：遊艇會、高爾夫球會、鄉村俱樂部、馬會……總之就是要你多多接近香港貴族富豪，建立關係，以便開展生意來往。這類個人會籍，只要你月月交會費，就可終身擁有，就算退休後也不會取消。
　　
於是部分集團高層同時擁有不少會籍，可是時間所限，根本甚少經常用到會所設施。一如小弟，雖然有馬會會籍，除頭幾年「新廁所」心態經常去，如今一個月最多用一兩次，疫情期間大部分時間封咗，月費變白供，故一群老友自稱「白宮會員」。
　　
名人A叔由英資大集團退休後，揸住十幾個會籍，根本少用，故連會員卡都不會隨身。
　　
好玩事發生！上周某個陽光燦爛早上，A叔拖住老婆在銅鑼灣海邊散步，大人話：「不如去遊艇會飲杯嘢好冇？」「好！」既然為遊艇會「白宮」會員二十幾年，冇乜用過佢設施，咁啱在附近，一於入去歎吓啦！
　　
坐下之後，經理眼神有點尷尬，但因A叔為名人，經理當然認得，低調埋嚟細細聲講：「A先生，呢間會所只供會員用。咁吖，我搵個會員幫你簽單吖！」A也細細聲回應：「我咪係會員囉！哈哈！」
　　
「吓……」經理面都紅晒：「唔好意思呀，我在此打工二十年，從來未服務過你……」
　　
「唉，我乃『白宮』會員嘛，供足二十年會費才來飲杯嘢，唉……真係……」