世界盃2022｜專家分析:三獅嘅最大爭冠敵人

同以往有碧咸、林伯特、謝拉特等球員在陣嘅時候比較，?家嘅英格蘭無晒「星」味，反而踢落更好。上屆世界盃入到四強，歐國盃更加入到決賽。先唔講攞唔攞到咩錦標，英格蘭嘅成績的確有進步，起碼唔再畀人「得個殼」嘅感覺。

事實上，英格蘭近幾年積極發掘新人，效果立竿見影。曼城嘅菲爾科頓、阿仙奴嘅布卡約沙加、多蒙特嘅祖迪比寧咸等球員，喺今屆世界盃大放異彩。艾爾尤其欣賞祖迪比寧咸，以往佢喺多蒙特嘅表現唔算突出，但經過時間嘅洗禮，今年喺球會同國家隊都大爆發。啱啱嗰場對塞內加爾，正正就由佢中場攞完個波再推上前，助攻畀佐敦軒達臣入第一球。佢可以話係球隊嘅「自由人」，由守轉攻嘅幫助好大，係英格蘭打反擊好重要嘅一個齒輪。

但講到底，英格蘭成日同冠軍擦身而過，好大程度同球隊嘅心理質素有關。成日話「期望愈大，失望愈大」，英國人對於足球運動引以自豪，媒體嘅大事報道、國民嘅高度期望等外在因素，特別影響到英格蘭嘅球員。每逢關鍵大戰，「三獅」總會展示唔返應有嘅霸氣，踢得比較綁手綁腳，結果成日都差少少。艾爾覺得外來嘅壓力係會為球員帶嚟負擔，但作為專業嘅運動員，如果持續克服唔到呢啲壓力，係好難上到最高位置。

講真，以「三獅」嘅質素能力，點可能無一個冠軍落袋？當然，領隊修夫基嘅臨場調動同部署係重要，但「最大嘅敵人唔係對手，而係自己」，艾爾唔係講緊廢話，呢句似乎更適用喺英格蘭身上。  -艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。