世界杯2022｜专栏：对付高卢鸡 丹麦有办“法”

葡萄牙以三比二险胜加纳，艾尔觉得葡军后防下半场的表现惨不忍睹，失嘅第二球睇到眼都凸埋。仲有，葡军门将迪奥高哥斯达喺补时差啲犯错，唔系伊拿基威廉斯把握唔到黄金机会，葡军随时阴沟里翻船。今仗之后，葡军领队费兰度山度士有必要重新检示后防组合，唔系对住有一定攻力嘅乌拉圭，同埋擅长打反击嘅韩国，前面入埋可能唔够后面失。

嚟到C组同D组嘅第二轮分组赛，戏码最精采嘅相信系法国对丹麦。上届冠军法国有种“皇马2.0”嘅感觉，即使宾施马退队，仍有“银河唯一”基奥特，基利安麦巴比同奥士文尼迪比利亦令“高卢鸡”如虎添翼。只不过，艾尔对领队迪甘斯嘅印象向来麻麻哋，最记得上届欧国杯十六强对瑞士，法国下半场领先到三比一，部分球员体力已经消耗唔少，但迪甘斯迟迟唔换人，结果法定时间被追平，互射十二码兼输埋，晋唔到级可以话系自己攞嚟。

北欧球队丹麦上届欧国杯杀入四强，除咗为曾经喺比赛途中心脏停顿嘅基斯甸艾历臣而战，领队祖文功劳好大。对比前任领队夏列特，祖文嘅临场调动做得好，打法上唔会过分保守。祖文为丹麦队带嚟唔少改变，系今届世界杯嘅黑马之一。汤马士迪兰尼今场唔可以为丹麦披甲，但球队阵式灵活程度几大，丹斯加特、安达斯奥臣等前线球员状态唔错，门将卡斯柏舒米高更系后防嘅定海神针。

自祖文上任以嚟，丹麦喺欧国联能够双杀法国。艾尔觉得丹麦可以凭较强嘅整体性，克住粒粒皆星嘅法国，要让球“+0.5/1”丹麦下盘，另外角球大细“9.5”大亦可留意。艾尔

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。