世界盃2022｜專欄：對付高盧雞 丹麥有辦「法」

葡萄牙以三比二險勝加納，艾爾覺得葡軍後防下半場的表現慘不忍睹，失嘅第二球睇到眼都凸埋。仲有，葡軍門將迪奧高哥斯達喺補時差啲犯錯，唔係伊拿基威廉斯把握唔到黃金機會，葡軍隨時陰溝裏翻船。今仗之後，葡軍領隊費蘭度山度士有必要重新檢示後防組合，唔係對住有一定攻力嘅烏拉圭，同埋擅長打反擊嘅南韓，前面入埋可能唔夠後面失。

嚟到C組同D組嘅第二輪分組賽，戲碼最精采嘅相信係法國對丹麥。上屆冠軍法國有種「皇馬2.0」嘅感覺，即使賓施馬退隊，仍有「銀河唯一」基奧特，基利安麥巴比同奧士文尼迪比利亦令「高盧雞」如虎添翼。只不過，艾爾對領隊迪甘斯嘅印象向來麻麻哋，最記得上屆歐國盃十六強對瑞士，法國下半場領先到三比一，部分球員體力已經消耗唔少，但迪甘斯遲遲唔換人，結果法定時間被追平，互射十二碼兼輸埋，晉唔到級可以話係自己攞嚟。

北歐球隊丹麥上屆歐國盃殺入四強，除咗為曾經喺比賽途中心臟停頓嘅基斯甸艾歷臣而戰，領隊祖文功勞好大。對比前任領隊夏列特，祖文嘅臨場調動做得好，打法上唔會過分保守。祖文為丹麥隊帶嚟唔少改變，係今屆世界盃嘅黑馬之一。湯馬士迪蘭尼今場唔可以為丹麥披甲，但球隊陣式靈活程度幾大，丹斯加特、安達斯奧臣等前綫球員狀態唔錯，門將卡斯柏舒米高更係後防嘅定海神針。

自祖文上任以嚟，丹麥喺歐國聯能夠雙殺法國。艾爾覺得丹麥可以憑較強嘅整體性，剋住粒粒皆星嘅法國，要讓球「+0.5/1」丹麥下盤，另外角球大細「9.5」大亦可留意。艾爾

加拿大星島WhatsApp報料熱線：(437)428-9394

下載「星島新聞(加拿大版)」App，隨時看到最新最快新聞：
iPhone：https://apple.co/2IBi812
Android：https://bit.ly/2Pe8anu

訂閱加拿大星島網電郵快訊，每天可收到最快新聞資訊電郵： https://www.singtao.ca/subscribe/singtao.php

>>>訂閱CCUE YouTube 頻道，查看更多吃喝玩樂、生活資訊影片。