頭條戲場丨《過時·過節》唔好再神化屋企係避風塘

新聞稿咁樣寫，《過時·過節》是一部關於家人關係的電影，故事由導演受自身家庭經歷而啟發，道盡家人之間的溝通和相處。簡單嚟講即係倫理電影，亦即係導演曾慶宏經歷過一啲唔太好的家庭問題，隔咗一排未完全解決，所以拍一套戲去釋放自己。有人覺得好睇，因為從戲中見到自己，情況好似睇星座分析性格咁，明明自己一早知，但見到有人分析自己又覺得好準呀，好好睇呀；有人就覺得唔好睇，因為太真實，真係好煩。我覺得中上，因為謝君豪的個人表演真係好出色。(剛上映)撰文:廖思慧

全片只要見到毛姐同謝君豪同場，就知後者又要被鬧。

 

談善言同謝君豪係父女，無乜兩句，靠眼神交流。

 

電影屬於「家家有本難唸的經」宇宙終極升級加強版，講述一場「混亂冬至飯局」發生後的家庭悲劇。從來都話有咩父母就有咩仔女， 睇馮素波飾演的婆婆對仔女的恐怖情緒勒索，就明白戲中的毛舜筠點解咁乞人憎，呂爵安脾氣點解咁火爆。

毛舜筠個角色真係好乞人憎
好多人願意包容唔太熟嘅人，但卻對最親密嘅人不留餘地，有咁Mean得咁Mean。謝君豪演得最好，飾演沉默又慢幾拍的老竇是絕種好男人，識搵一定搵呢種，見佢被老婆即毛舜筠長期精神虐待及言語暴力都忍到，仲可以講道理，但個女人即毛舜筠唔識珍惜，最後抵佢死的。對於感情，性格唔夾，講極唔明，問題不斷重複又重複都解決唔到，一律主張分手，真係唔好拖。

Edan戲中同老竇謝君豪好唔妥。

 

毛姐角色玩精神虐待可以拎100分。

 

毛姐角色會做鐘點，因為喺自己屋企得唔到愛，而轉去人哋屋企感受咩叫家庭溫暖。

 

冇強行硬Sell溫馨大團圓幾好
由細到大睇戲都經常聽到類似對白，「出面遇到咩唔開心、工作有幾咁唔如意、俾老公老婆蝦、男女朋友對你唔好」等等，唔緊要，屋企永遠都係你嘅避風塘，一直想反駁好耐，唔一定㗎，屋企人玩情緒勒索先最出色，睇完呢套戲終於有導演肯以正視聽，多謝導演唔硬加矯情的正能量，點解一定要齊齊整整先叫好?

睇Edan歇斯底里就好鬼頭痕
電影以MIRROR的呂爵安(Edan)及盧瀚霆(Anson Lo)作重點宣傳，後者飾演同前者有生意關係的好朋友，表現稱職，因為戲份唔多。至於Edan的演技就好熟識，好似睇緊《I SWIM》李馬榮同老竇鬧交，每次見親佢好激動都會好出戲，睇嚟Edan練咬字之餘都要好好上演技堂。
 

戲中Edan離家出走8年，不孝子。

 

終於到AL，唔想寫佢太多，因為佢只係客串，請將注意力放喺謝君豪同毛姐身上。

 

Edan角色唔討好，但唔夠佢阿媽咁乞人憎。

 

全片MVP，最後同毛姐講嘅對白，大快人心。

 

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。