你老公乜乜物物

男人，結婚愈耐，回到家時會愈沉默，並唔代表佢哋冇嘢想講，而是…… 知道講完之後， 可能要啃苦果，所以，選擇收聲。
　　
一切想講的，留返同豬朋狗友噴口水Bullshit時才呻，安全系數高好多也。
　　
呢方面，舉世做太太的都未必明，但又無謂明，因明咗都不會有改變。
　　
認識不少在官場、專業或私人機構做頭頭的人物，雖則日理萬機，做主席主持會議一個接一個，但一踏入家門，立即個口撬都唔會開。
　　
呢類人士，通常在社會上有一定知名度，所做的事，不少與大眾利益攸關（例如高官、政客、法官、上市公司CEO）。正常地，當然有同路人，也會有「對頭人」（不一定敵人），所以，都會背後對你「說三道四」，間中呢類閒言閒語若見諸媒介，咁就煩。
　　
因為縱使你老婆明白事理，不過，佢的生活圈子，無論親戚或朋友，總有不少Heresay之輩，以訛傳訛之下，對你的行事決定，必有批評。然後，輾轉去到老婆大人的「雷達範圍」，諸事的，可能直接窒：「聽講有人話你老公乜乜物物喎（通常係衰嘢，例如得失人啊、畀人砌呀、處事不公呀、有小三啊……）。」人，總會受人影響。當你老婆聽得多，當然唔開心，於是等你返閨時，少不免呻或質兩句。
　　
咪睇輕呢類「呻/質兩句」的威力，絕對會令大人物不勝其煩，可能影響日後處理公事時，再沒法作出百分百公正無私判斷。只因佢都係個人，人總會受情緒影響也。
　　
間中，小弟都有擁有公權者老友埋怨：「唉，真係煩。返屋企點可透露公事？」
　　
不過，萬事有相對的。我就不時玩「周街讚人」，尤其出色的廚師。讚呀讚（要真心的），說話好易會傳到去廚師老婆、外家、老友、同學、同行耳中，於是，就出現老婆甜蜜蜜話：「老公呀，有人讚你乜乜物物喎！」
　　
呢下鼓勵，令正能量爆升，整乜畀我歎都好食啲㗎！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。