防止強積金撳住搶

近日不少打工界朋友都口噏噏——強積金、蝕鑊金！因今年持有強積金者，真係蝕到嗌阿媽，喊到收唔到聲。
　　
強積金設計，本來意願是協助打工仔強行儲錢，以保障退休後的經濟安全。故此，個個要供，而只可六十五歲才提取。
　　
可惜，原意雖好，但結果卻為打工界帶來災難。先天上的，引入外國金融大鱷，「扮演」基金經理，將十多億元供款當為「提款機」，通過不停買賣各類「投資產品」，先賺佣，再收行政費用。基金經理一買一賣有佣賺，當然唔會錫住客仔的錢！大市漲時，齊齊賺錢。但大市一跌，會點？佢繼續賺而你蝕到叫阿媽！
　　
整個設計，對供款者非常不利。終於，今年大大鑊了。因全球大市狂瀉，強積金變「強輸金」，全部攬炒，輸到嘔白泡！頭九個月蝕去二千五百八十九億元，令強積金盈餘第一次跌破萬億元。任何打工仔如今套現，必定一頸血！
　　
簡單計算，四百五十七萬打工仔，今年頭九個月每人蝕去五萬六千元，點可以唔嘔血？
　　
老老實實，我不是先知，不過，只是用普通常識分析，早早已肯定這個強積金供款安排，擺到明養肥一眾揸Fit的國際大鱷基金經理。在冇乜約制下，任佢哋上下其手盡賺私己錢。說來，當時負責官員係咪食懵咗，唔識用政策制衡（正是許仕仁）！
　　
小弟人微言輕，睇住咁鬼大個氹，除在電台節目大聲疾呼外，可以做乜？
　　
結果，慘矣。果然是整個強積金計畫，根本是國際基金大鱷「撳錢」計畫。創造出N咁多基金名稱，美其名任供款者揀，其實十之七八真實為「任佢撳」，通過頻頻又買又賣賺佣，加行政費，斬大大筆。
　　
整個安排，就是基金經理必贏，而供款者九成必輸或只能贏少少。
　　
我早早踢爆，並忠告所有朋友，為免被基金經理劏，唯一可做是自保。只買「保本」的Plan。這個，當然不受基金經理歡迎，但只要你堅持，佢亦吹你唔脹。起碼到今天，你仍立於不敗之地！　

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。