躁狂電影玩嘢導演

剛剛在Netflix睇完一套上架不久的法國電影《雅典娜》（《Athena》），內心有說不出的不快及納悶之感。點解？唔想在此解釋，亦唔想透露劇情。相信十個香港人，起碼有八個，一邊睇也一邊有此感覺，但願套戲快點完，但又不想放棄睇，因想知結尾如何也。
　　
此片導演名羅曼加華斯（Romain Gavras），在法國廣告及MV界頗具名氣，作品以影像強烈見稱。玩攝影，玩鏡頭，玩到出神入化，極具天分。原因？有遺傳因子！羅曼父親名哥斯達加華斯（Costa Gavras），在法國電影界享譽甚隆，大名鼎鼎，資深影迷不少對佢有崇敬之心。點解？因佢在一九六九年拍咗一部震撼性電影《大風暴》（《Z》）， Z，在當年的希臘示威者口號中代表「生命」，意思為爭取正義至死無悔。

哥斯達的《大風暴》，以希臘一位廣受支持的議員布林拉基斯遇襲案作藍本，片頭兩句，至為經典——本故事如有雷同，純屬故意。
　　
《大風暴》引起當時社會極大共鳴，一舉掃下康城影展評判團獎、金球獎及奧斯卡最佳外語片殊榮，乃法國影壇一大驕傲成就。
　　
講返《雅典娜》，羅曼擺明有齊乃父哥斯達加華斯的「火」，對電影的火，對社會不公的火，但深度卻遠遠不及，故此，電影拍出來，躁火有餘而信息不足。
　　
結果，參加第七十九屆威尼斯影展，空手而回，只得到一個聯合國兒童基金青年電影獎。不過，值得一提為此獎的評審團，由過百名十八至二十五歲、來自不同國家的青年組成，有特別代表性。點解佢哋會選中此片？你睇完，必定會內心先一沉，極度不安。
　　
小弟評語：羅曼是個躁狂高手玩嘢導演。單單睇佢開場那幕十一分鐘一鏡直落的安排，已顯示其玩嘢之心幾誇張。呢場戲，綵排足足兩個月，難度絕高，因經過室內與室外，光明與幽暗，高空與在地，槍戰與平靜……的確有欣賞價值。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。