馬會新班子出閘脫腳

英國政府新班子上場，套用賽馬術語，正是大漏閘、唔識跑、兩頭片、大波勾、頭岳岳，然後直路踩氹……總之第一場已輸「ML」（Many Lengths），即係輸到完全唔係路也。
　　
我都幾肯定，呢個新首相領導的班子，散檔已成定局，必創英國歷史上最短命的內閣，因為實在差得太離譜。
　　
最大得益，當然為工黨。不費吹灰之力，民調上突然彈離保守黨十個馬位，任何時候大選，皆可以狂風掃落葉勝出，將保守黨連根拔。
　　
香港又如何？政府新班子無論你點批評，肯定好過舊班子，再跑落去睇吓點先啦。
　　
香港另一舉足輕重機構馬會，也是今年換主席，換部分董事，也換去不少總監及行政人員。
　　
初步睇，看台公論，有點出閘脫腳，發生幾單嘢都唔多「正常」。馬迷雖然仍可馬照跑，但見到一個年薪四千幾萬元CEO領導下的機構，出現騎呢的錯，又似乎好難原諒。
　　
我講的，當然不是甚麼「指鹿為馬」事件。而是簡簡單單派個背包（坊間全部戲言此為「輸包」）去谷國慶賽馬日，結果派到一鑊泡，天怒人怨。睇清楚，犯上的實在是「低級錯誤」，以高效見稱的馬會，豈會如此？早早宣傳入場有背包送，聲明「先到先得，送完即止」。結果，一切反效果！
　　
因為原本可以簡簡單單見人即派、派完即止的禮物，唔知邊個蠶蟲師爺度出要事先登記QR Code，入到場要再等收短信，幸運地有嘞，仍要摸出尖沙嘴或灣仔領取。用古老廣東俗語，完完全全是「撚化馬迷」！搞到前線員工個個「阿媽有難」！唉……
　　
另一單今季神奇個案，是兩位前領騎師莫雷拉及田泰安突然無限期自動停賽啦。
　　
新班子究竟「黑」幾耐，我都好想知呀！
　　
講講明日，最高觀賞價值為第十場二班千四米，有幾隻明星馬出戰。
　　
我覺得潛質最高為方廄大賽棋子「喜旺駒」！一於用佢做二重彩複式膽，拖兩隻「包裝」、「少爺仔」及「瑪瑙」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。