独家丨叶念琛唔谂攞奖Enjoy被封“MK活地亚伦” 尊重有导演精雕细琢：我想拍多啲

由叶念琛监制、执导及编剧的TVB 55周年台庆剧《美丽战场》，本周开播即成话题作，叶导直认剧集属“狗血剧”，亦一早已厘定行恩怨情仇这条路，及钦点陈滢孭飞，但就否认借陈滢及方力申绯闻炒热剧集，“咁做等如对自己好冇信心！”他又自揭执导18年冇停过揾到“金主”投资之谜，更大方谈论被封“MK活地亚伦”感受。采访：杜杜 摄影：谭志光

叶念琛认为TVB已太耐冇恩怨情仇剧集，所以好想制作一部。

47岁的叶念琛坦言对恩怨情仇剧集有情意结，由细睇到大，所以获曾志伟邀请后，即谂到开此类剧，“细个同阿嫲阿爷住，一起身就开电视，由朝早粤语长片，到夜晚播完《欢乐今宵》就熄电视瞓觉，好记得𠮶时都系呢啲恩怨情仇剧如《流氓大亨》、《义不容情》，大啲钟意睇《天地男儿》、《天地豪情》，到志伟问我就话好耐冇呢类剧，不如我帮你搞。”叶导坦承剧集好狗血亦好激，唔知会唔会成功。

本周一晚（3日），叶念琛约埋《美》剧演员齐睇首播。

日前，叶念琛率领一众演员出席记者会，为剧集造势。

用陈滢因为好唔TVB

《美》剧跟电影一样由叶念琛亲自写剧本，他称20集剧跟电影大不同，花了很多时间做资料搜集，亦早已选定陈滢、方力申及蒋家旻才动笔。他认为陈滢非女主角“阿宝”莫属，因为她在叶导心目中冇咁TVB，“佢𠮶种倔强同自信，几得意，好吸引。”他跟蒋家旻曾于2013年合作电影《第一次不是你》，叶导专登安排大反派让她发挥，“我都几有信心头几集，大家会未见过咁样嘅蒋家旻，去到咁尽，我对佢有信心。”

叶念琛早在陈滢未入行前已认识，一直很欣赏对方。

叶念琛跟蒋家旻相隔9年再合作，他认为对方演出是最少需要调教的一个。

至于合作无间的老友方力申，叶导就希望他凭此剧重新出发，“我同佢讲呢几年冇乜演过戏，好似半退休，得闲做啲综艺，其实仲想唔想演戏，佢话想演，角色开头系乐观，后面经历咗好多变得好阴沉，见到佢闹同打阿滢，系大家冇见过嘅方力申。”至于揾小方同陈滢做一对，叶导就否认借绯闻来宣传，“出嚟一定会多啲noise，佢哋做两公婆！对个剧冇特别影响，我要用呢样嘢去做，等如对自己好冇信心啦！”

跟小方老友鬼鬼，叶念琛好希望这次演出令对对方脱胎换骨。

叶念琛认为林盛斌搞笑已够皮，今次专登揾他做暖男角色。

感激Paco捧做导演

叶念琛执导18年，一直keep住有新作品，问到有何方法得到投资者欢心，他相信能够控制好budget是关键，“晶哥、志伟同Paco（黄柏高）都系咁教，唔好over budget，因为我经历第一、二部戏时好艰苦，人哋都唔知你乜头乜路畀你做导演，所以咁多年嚟都好感激Paco，佢叫我做导演，我第一次仲拒绝，话畀我返去谂几日先，都几大胆。”叶导称Paco系佢恩人、伯乐，坦言有啲人对你比你自己更加有信心，如Paco。“就好似戏里面陈山聪鼓励陈滢一定会红，一定要签畀佢，Paco同我嘅关系就系咁，如果唔系佢我都唔会做咗导演。”得到前辈提携，叶念琛对新晋导演会给予正面鼓励，因为现在投资气氛差，他们更艰难，“新导演佢哋会好辛苦，因为票房、戏院或者投资嘅戏，比起我𠮶时考验更大，系要畀鼓励。我好钟意《手卷烟》，有返以前拍《古惑仔》𠮶啲feel，陈健朗好好，仲有（陈）小娟又好好，《沦落人》好感动，其实个个都好有特色。”

叶念琛首部执导作品《甜丝丝》，就是Paco畀机会。

叶念琛感激曾志伟让他首次执导大片《72家租客》，今次对方邀请合作当然唔会托手踭。

多年来只凭2003年《大丈夫》和2006《独家试爱》获提名金马奖最佳原著剧本及金像奖最佳新晋导演，最终两奖落空，叶念琛毫不介意，因他早已选定宁有票房也不要奖，“攞奖唔谂，呢啲系命嚟，我从来都系要票房，票房咪系最大嘅奖，同埋最紧要有下部戏，我以前写好多影评先至做编剧，所以唔系好介意点样批评。”就连“MK活地亚伦”这个明踩的外号一样不介意，“大家话MK Woody Allen，我几enjoy，仲亲切咗，个个都咁嗌我，自己冇问题就得。”他认为这条路是自己选择，“我尊重人哋，佢钟意3年一部，你钟意精雕细琢冇问题，不过自己立场系拣咗拍多啲，同埋我想早啲见到得唔得，得咪再开囉！呢个唔得，观众唔钟意咪改囉！”

向来搞制作身兼多职的叶念琛，他认为亦有助控制成本。

叶念琛拍摄习惯，除了大部份时间一日一组，美食亦不能少。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。