獨家丨葉念琛唔諗攞獎Enjoy被封「MK活地亞倫」 尊重有導演精雕細琢:我想拍多啲

由葉念琛監製、執導及編劇的TVB 55周年台慶劇《美麗戰場》,本周開播即成話題作,葉導直認劇集屬「狗血劇」,亦一早已釐定行恩怨情仇這條路,及欽點陳瀅孭飛,但就否認借陳瀅及方力申緋聞炒熱劇集,「咁做等如對自己好冇信心!」他又自揭執導18年冇停過搵到「金主」投資之謎,更大方談論被封「MK活地亞倫」感受。採訪:杜杜 攝影:譚志光

葉念琛認為TVB已太耐冇恩怨情仇劇集,所以好想製作一部。

47歲的葉念琛坦言對恩怨情仇劇集有情意結,由細睇到大,所以獲曾志偉邀請後,即諗到開此類劇,「細個同阿嫲阿爺住,一起身就開電視,由朝早粵語長片,到夜晚播完《歡樂今宵》就熄電視瞓覺,好記得嗰時都係呢啲恩怨情仇劇如《流氓大亨》、《義不容情》,大啲鍾意睇《天地男兒》、《天地豪情》,到志偉問我就話好耐冇呢類劇,不如我幫你搞。」葉導坦承劇集好狗血亦好激,唔知會唔會成功。

本周一晚(3日),葉念琛約埋《美》劇演員齊睇首播。

日前,葉念琛率領一眾演員出席記者會,為劇集造勢。

用陳瀅因為好唔TVB

《美》劇跟電影一樣由葉念琛親自寫劇本,他稱20集劇跟電影大不同,花了很多時間做資料搜集,亦早已選定陳瀅、方力申及蔣家旻才動筆。他認為陳瀅非女主角「阿寶」莫屬,因為她在葉導心目中冇咁TVB,「佢嗰種倔強同自信,幾得意,好吸引。」他跟蔣家旻曾於2013年合作電影《第一次不是你》,葉導專登安排大反派讓她發揮,「我都幾有信心頭幾集,大家會未見過咁樣嘅蔣家旻,去到咁盡,我對佢有信心。」

葉念琛早在陳瀅未入行前已認識,一直很欣賞對方。

葉念琛跟蔣家旻相隔9年再合作,他認為對方演出是最少需要調教的一個。

至於合作無間的老友方力申,葉導就希望他憑此劇重新出發,「我同佢講呢幾年冇乜演過戲,好似半退休,得閒做啲綜藝,其實仲想唔想演戲,佢話想演,角色開頭係樂觀,後面經歷咗好多變得好陰沉,見到佢鬧同打阿瀅,係大家冇見過嘅方力申。」至於搵小方同陳瀅做一對,葉導就否認借緋聞來宣傳,「出嚟一定會多啲noise,佢哋做兩公婆!對個劇冇特別影響,我要用呢樣嘢去做,等如對自己好冇信心啦!」

跟小方老友鬼鬼,葉念琛好希望這次演出令對對方脫胎換骨。

葉念琛認為林盛斌搞笑已夠皮,今次專登搵他做暖男角色。

感激Paco捧做導演

葉念琛執導18年,一直keep住有新作品,問到有何方法得到投資者歡心,他相信能夠控制好budget是關鍵,「晶哥、志偉同Paco(黃柏高)都係咁教,唔好over budget,因為我經歷第一、二部戲時好艱苦,人哋都唔知你乜頭乜路畀你做導演,所以咁多年嚟都好感激Paco,佢叫我做導演,我第一次仲拒絕,話畀我返去諗幾日先,都幾大膽。」葉導稱Paco係佢恩人、伯樂,坦言有啲人對你比你自己更加有信心,如Paco。「就好似戲裏面陳山聰鼓勵陳瀅一定會紅,一定要簽畀佢,Paco同我嘅關係就係咁,如果唔係佢我都唔會做咗導演。」得到前輩提攜,葉念琛對新晉導演會給予正面鼓勵,因為現在投資氣氛差,他們更艱難,「新導演佢哋會好辛苦,因為票房、戲院或者投資嘅戲,比起我嗰時考驗更大,係要畀鼓勵。我好鍾意《手捲煙》,有返以前拍《古惑仔》嗰啲feel,陳健朗好好,仲有(陳)小娟又好好,《淪落人》好感動,其實個個都好有特色。」

葉念琛首部執導作品《甜絲絲》,就是Paco畀機會。

葉念琛感激曾志偉讓他首次執導大片《72家租客》,今次對方邀請合作當然唔會托手踭。

多年來只憑2003年《大丈夫》和2006《獨家試愛》獲提名金馬獎最佳原著劇本及金像獎最佳新晉導演,最終兩獎落空,葉念琛毫不介意,因他早已選定寧有票房也不要獎,「攞獎唔諗,呢啲係命嚟,我從來都係要票房,票房咪係最大嘅獎,同埋最緊要有下部戲,我以前寫好多影評先至做編劇,所以唔係好介意點樣批評。」就連「MK活地亞倫」這個明踩的外號一樣不介意,「大家話MK Woody Allen,我幾enjoy,仲親切咗,個個都咁嗌我,自己冇問題就得。」他認為這條路是自己選擇,「我尊重人哋,佢鍾意3年一部,你鍾意精雕細琢冇問題,不過自己立場係揀咗拍多啲,同埋我想早啲見到得唔得,得咪再開囉!呢個唔得,觀眾唔鍾意咪改囉!」

向來搞製作身兼多職的葉念琛,他認為亦有助控制成本。

葉念琛拍攝習慣,除了大部份時間一日一組,美食亦不能少。

點擊以下6大平台 接收加拿大新聞及生活資訊
加拿大星島WhatsApp報料熱線:(437)428-9394

下載「星島新聞(加拿大版)」App,隨時看到最新最快新聞:
iPhone:https://apple.co/2IBi812
Android:https://bit.ly/2Pe8anu

訂閱加拿大星島網電郵快訊,每天可收到最快新聞資訊電郵: https://www.singtao.ca/subscribe/singtao.php

>>>訂閱CCUE YouTube 頻道,查看更多吃喝玩樂、生活資訊影片。
share to wechat

延伸閱讀

share to wechat

延伸閱讀

王浩信出道19年與「媽媽」慶祝?瞞住家人做歌手 成名後送豪宅無預陳自瑤

Art Central丨群星撐樂易玲兩子參展!湯洛雯顧紀筠鬥晒Hermès 張艾嘉九旬母坐輪椅支持外孫

英國BBC電視台啄住喜多川性侵案 受害人超難追討賠償更接死亡恐嚇

Lucy 6歲生日大擺萌爆甫士一舉動晒家姐風範 Sucy被蛋糕吸引目不轉睛

都市網新聞