「忽蟲」玩完玩「忽龍」

如果貼馬有咁準就發達喇！講乜？正是上周三，「夫卜」（Full Book）的冠軍騎師潘頓，突然玩「忽蟲」，結果「夫仆」，當中包括兩隻全熱門，八場直落瓜清，輸到捧場馬迷嗌阿媽。
　　
因暫時冇咗莫雷拉及田泰安，故個個以為潘頓會「玩」隻手遮天，故場場搵佢做「扶手棍」。結果，真係「隻手遮天」，不過玩相反，犀利到坐騎全部參加「冇影行動」，谷爆投注者個肺。
　　
呢種「忽蟲大法」，精明如潘頓，當然唔會直落再玩。故此上周六小弟就在本欄指明佢會當日又「師傅上身」，大玩「忽龍絕技」。果然！一郁手，立即兩W兼𡁻六場Q，又戴上個靚靚「皇冠」，做其「騎師王」矣，真係畀佢玩殘！
　　
我不時發夢出任監場董事，每場賽事後坐在研訊室，盤問表現有疑點騎師。用的，不是我問你答，而是用美國偵探片經常出現的測謊機。咁就肯定有料大爆特爆，理解全場布局，哦……唔怪得知你由出閘第一秒即咁走位、推騎、用鞭……啦。如此，賽後報告，必定精采得多。
　　
近日評馬界有個集體呼聲，為請馬會正正式式來一次官式公布。公布乜？正是上兩季前領騎師莫雷拉及田泰安，究竟發生乜事？請將一切清清楚楚用書面或記者招待會解釋。
　　
任何可疑事件，愈交代得唔清楚，就會愈多無無謂謂的亂估，有人又會刻意放出「小道消息」。偏偏大多數人皆八八卦卦，喜歡聽陰謀論。尤其你隱隱晦晦時，更有利「亂作」之輩做嘢，講到小說咁橋段都得。
　　
「謠言」，不會止於智者，只會擴大於奸的「智者」。對付方法只得一個，講道理擺事實。
　　
好，睇睇今晚個局先。預計潘頓會表演「龍蟲混合體」！係咪好鬼有趣？
　　
研究第一場三班一千米。
　　
「宜春輝煌」上季尾此程兩次拋離勝出，六十三分變八十一分。唔好唔出，操足又考閘，W得。
　　
腳拖首次出賽的「英雄豪邁」，外地兩出兩W，試閘會飛！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。