點解我咁鬼Fit？

香港人，有兩樣嘢個個都會長期做，但超過七成長期「失敗」，係乜？
　　
估中冇獎！正是：一、投資；二、減肥Keep Fit。
　　
投資，唔使解釋嘞。尤其今年，大家蝕到褲穿窿仍可自我安慰，因為所有國際股神級人馬都蝕到儍，人哋贏你十班波都咁，你仲想賺？係咪妙想天開發緊春秋大夢呀？
　　
事實，連聘用無數高手操盤的香港金融管理局，都蝕到「歷史上最慘烈」，真係多年罕見。
　　
小弟又如何？當然一模一樣。尤其近日英鎊急挫，連累一切有物業在倫敦的香港上市公司，股價大幅調整，硬食。我手頭就有兩隻，包括長實及領展，人人問我會否止蝕。
　　
儍啦，呢個時候、呢個價位止蝕？若會如此決定者，根本唔應該學人投資股票！今天要做的，是再詳盡分析究竟股價急挫，有幾大成分係架構性的，又有幾大成分係恐慌非理性的。假若是前者，當然要減磅了。假若是後者，則應該伺機吸納，愈低愈掃，因這類黃金機會，絕對罕有。吸後放入夾萬，一於長揸收息，再等升值可也。
　　
講完投資，講減肥Keep Fit，也是十個有七個失敗，短途可能得，長期則要高度紀律及苦忍，更需要放棄口福，若非職業需要，例如騎師及職業運動員，否則，唉……人生苦短，為乜要虐待自己，放棄享受美好食物的機會？
　　
不過，總有不少成功例子的。
　　
昨日與久久不見的「高官T」晚餐。一見……

咦，點解靚仔咗、年輕咗、Fit咗……咁鬼多嘅呢？
　　
立即問道：「喂，兩年冇見，為何可以有咁變化？」
　　
「碌Sir，要有高度自律性㗎！首先，餐餐只食六分飽，澱粉質幾乎全戒，完全唔飲酒。無論幾攰，公餘都日日逼自己跑五公里消脂，然後就係……」
　　
就係乜？朝朝食蜂皇漿，久不久老婆大人用野生蟲草燉雞畀T哥補身。另外，每日再食幾種維他命補充劑。
　　
聽完，小弟自知絕冇機會學到，不過，如今全面公開，大家可以照抄也！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。