你憑乜收咁貴?

香港人不少心中有把尺,覺得若達到某個目標,就算「成功」嘞。
  
當然,有人較市儈,以財富計,例如十億元身家。有人以是否讀到博士、做到教授計。有的則希望「捱」到個太平紳士銜。較普遍的,是成為乜會乜會會員,例如遊艇會、香港會、鄉村俱樂部、高爾夫球會或馬會等。
  
當中又有一種身分幾特別,是馬主(喂,並非十幾二十人夾嗰種噃),一個人擁有一隻或數隻馬。
  
有乜咁巴閉?即係你經濟好掂也。因買一隻馬,好耐以前已經百萬元計。然後,每個月幾萬元養馬費。唔掂點搞?想充大頭鬼?行開啲啦!
  
老老實實,經濟好時,樓升股升,魚翅撈飯的日子,對不少富豪來說,幾萬蚊,濕濕碎。不過,花無百日紅,過去三年,大市環境幾差,香港人邊個唔知?
  
正如唐英年講:「不少行業在吊鹽水,在陰乾,再唔開關,好多就會斷氣!」
  
普遍財富萎縮,收入大減。不過,若你養隻馬,費用有冇得減呢?不但冇,反之年年加加加!最新馬會發出的各廄「平均練馬費用」(即不包括N種藥物、運費、特別飼料、報名出賽……),已漲到由五萬二千七百八十四元(文家良)到七萬二千三百五十八元(黎昭昇)。究竟如今香港地,有幾多人頂得順?呢下真係變咗身分象徵嘞。
  
小弟最好奇,究竟黎昭昇憑乜收咁貴,竟然多第二位蔡約翰七千幾元?或許當佢有馬出時,就可揭曉了。
  
不過,睇收費表,最「物有所值」是告東尼(五萬七千四百四十一元)、姚本輝(五萬七千四百九十四元)及沈集成(五萬九千一百二十八元)。若有馬,我會畀佢哋操。
  
講完練馬師講騎師,明日再次冇莫雷拉。佢跑咗兩日,好明顯唔多妥。包括冇鬥志、冇狠勁。場場最後二百米已經手部放軟(請重溫巡邏影片),肯定有事。健康大過天,未搞掂,千祈咪再上陣!
  
明天三級賽,「加州星球」熱爆!一於用佢做二重彩複式膽,十蚊注食全餐可也!

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

都市網新聞