粉嶺高球場之爭

粉嶺高爾夫球場之爭,一拖數年,睇個款,將會繼續拖落去,陷膠着狀態。
  
原因?保留現狀派(背後大量香港有權有勢「高等人物」不停發功,招招有伏筆!)實力唔簡單。至於建公屋派,也咬住唔放,因香港公屋嚴重不足,加上上屆政府已定下難以抹去的政策,好難令這個議題消失。
  
過去幾個月,不停有人問小弟點睇?企邊面?我根本唔會企一面咁戇居!討論問題,應由客觀分析出發,一旦「企埋一面」,點理性呢?
  
相信香港不少人也如我,不打高爾夫,冇興趣之餘,亦知此乃「貴族活動」。想排隊入會?下世都未輪到,根本唔使諗,故從未有任何幻想。
  
事實,理論上粉嶺高球場存在與否,與九成香港人冇切身關係。
  
不過,若大家去過此球場,一定會贊成,真係好靚,設計好有品味,不少天然生態,在此才可以搵到,日日夜夜都見罕有生物出現。為乜要摧毁一個如此有歷史價值、有生態價值、有優美設計的球場呢?
  
你唔好話畀我聽香港冇地!香港大把地!如今發展咗的,只三成。要起樓,可以「釋放」大地產商控制的大量地皮、可以加速市區重建、可以放寬丁屋高度、可以移動郊野公園邊陲⋯⋯真係N咁多方法,千祈咪畀利益衝突聲大大誤導!佢哋個個屬私人地皮利益「持份者」,當然會生霸死霸擁有的權利,唔逼唔妥協。
  
唔好「屈」人仇富,事實粉嶺高球場由始至終皆只得一小撮人霸住「獨家享受」。小市民若非近兩年的爭議,想入去行吓?發夢冇咁早!
  
呢呢,如此狀態,正正孕育出——反正我都冇分,拆鬼咗佢建公屋又如何,好過唔公平地變特權階級專利的心態。
  
試想想,若粉嶺高球場係維園、香港公園、紐約中央公園、倫敦的海德公園⋯⋯的話,有冇人敢動議剷平佢,起私樓又或起公屋?講吓都成「城市市肺罪人」啦!
  
要保住高球場,最佳方法,立即將佢變共同擁有的空間。

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

都市網新聞