王菀之最搶眼

港產片擁躉，過去兩個月真的大快樂，因為輪流上的電影，套套有一定質素外，更重要，有「港味」（唔使解釋喇啩？），真係一睇就知本土製作。難得市場反應非常好，相信全部未衝出香港前（除《明日戰記》，太重投資！），應該已翻本，再有錢賺！
　　
事實已經足足三年未見電影院有咁多上座觀眾，更難得絕大部分微微笑離場，顯示收晒貨，不枉真金白銀支持也。
　　
剛剛我又睇咗《飯戲攻心》。火速入場，因見到陳詠燊名字，近年本土製作，這個名已是質素保證，佢單做編劇已如是，如今兼任導演，也如是。
　　
陳導演對上一套作品，乃二○一八年的《逆流大叔》，小本製作，但觸動人心，將幾位主要演員，包括吳鎮宇、潘燦良、黃德斌及余香凝，拍出陣陣神彩，性格非常吸引，令觀眾融入，與劇中人共同呼吸。
　　
這種功力，絕大部分導演冇㗎！
　　
結果電影狂收千六萬元，口碑、票房皆大勝。不過，陳詠燊絕冇濫拍，磨劍幾年，再自編自導《飯氣攻心》，也是高難度動作，因全片九成時間發生在一間屋內，如何令劇情、鏡位、走位（演員）及場景深度、闊度得以發揮，唔簡單。總的來說，整個調度，相當成功。
　　
基於空間細小，如何在同一場景有不斷起伏的吸引力，極度考功夫。此外，就要看演員卡士了。大家恍似「困獸鬥」兩小時，來來去去主要在飯桌，之外就是十步八步面積內演戲，若欠缺舞台劇的訓練，必定難以勝任。
　　
幸而論水準，黃子華、鄧麗欣、張繼聰、王菀之、林明禎及陳湛文六個主要演員，全部交出非常專業水準。
　　
相信大部分觀眾因黃子華而來，正路。我的評價又如何？個人認為，若要比併演技，王菀之最高班，全程收放自如，完全冇演戲痕迹，單單睇佢出現的幾場，已值回票價。真的希望，未來有套電影，百分百由王菀之個人擔正女主角，肯定絕對有望成為香港影后！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。