加拿大中國心等開關

今日標題，有點誤導！因為加拿大早早已經開關，使乜等呀？西方世界，全部打通，又搞大型國際活動，又萬人空巷演唱會，個個唔使戴口罩放聲高歌，羨慕死我哋呢班「口罩人」。
　　
咁等邊度開關呀？嘻嘻，等中國呀！
　　
眾所周知，過去幾十年，移民加拿大的香港人數以十萬計，有的留低，有的回流。留低的，大部分雖已入籍，但並非個個個心屬「加拿大心」，不少仍百分百「香港心」，甚或是「中國心」。
　　
童年老友「光頭W」正屬此類。唔知點解，移民幾十年，但日日交往的，仍只香港人，睇的只是香港電視及港版報章，關心的全屬香港大中小（即八卦！）新聞，收料畀我哋更準更快。
　　
過去十年，退休嘞，更犀利，不時掛在口邊「以做中國人為傲」，因國家日比日強大，走入多倫多白人社區，可以昂首闊步，因中國無論軍事外交經濟……瓣瓣勁！
　　
自從加航有機直飛中國後，「光頭W」更每年四次飛中國留半年，話要見證國家繁榮（但來來去去，唔知點解只鍾情大灣區），享受美好的一切，並在當地置業。
　　
不過，哎吔，慘！疫情一爆，乜都冇得「玩」咯，對大灣區的一切（包括……），只得日夜思念而無法「回去」，故開始對中國的防疫政策頗多怨言。
　　
本來仍想千方百計買機票闖關，但見到又紅碼又黃碼，再加隨時被困強檢清零，更在手機見有大公司爆疫，立即唔准走，嚇到鼻哥窿冇肉。於是買了的機票改了又改，次次泡湯，不過，難得仍有「旺盛鬥志」。
　　
昨日來電：「碌Sir，我決定嘞，趁香港鬆綁三加四，一於先回港，再等待機會抽名額，勇闖大灣區！」
　　
「好心你啦，做咗加拿大人，就唔好日日夜夜發夢返大灣區啦。不如咁啦，放棄加籍，堂堂正正搬返中國，轉返中國籍，享受作為中國人的驕傲，咪仲好過兩頭竄咁煩啦！」我提議。
　　
「喂喂，你第一日識我咩，邊有咁儍呀！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。