騎師王Vs.練馬師王

叮叮叮叮，捱完兩個悶熱月份，人生再充滿希望喇！精神大有寄託，老友間話題不絕，毋須鋪鋪呢樣嗰樣單單鬧政府，正！
　　
今季最多人關注，當然是兩位新丁練馬師。紐西蘭冠軍黎昭昇只三十二歲，得到香港馬會垂青，一定唔嘢少。但勁成點，有冇蔡約翰呢類翻手為雲、覆手為雨功力，全港馬迷關注，希望佢能帶大家上更高層次！
　　
伍鵬志也是三十幾歲，馬會左揀右揀揀中佢，必定有因。事實，過去十年馬會升本地薑，從未出錯，尤其葉楚航及羅富全，更可掃低過江龍及本地老薑，成為冠軍。
　　
明天又有新玩法，正是「練馬師王」。
　　
老友問我玩唔玩？答曰：「唔玩！先觀察三幾回，摸熟馬會究竟想搞乜先！以免好似『騎師王』咁，擺明搵馬迷笨，買落去已變四分一條水魚！」
　　
點解我咁講？大家可知，「騎師王」的設計，就是由馬會做莊，自己開賠率，然後與廣大投注者對賭。普通常識（真的如此），馬會在設計上，點會比自己有機會輸？故此，在賠率方面，佢著數晒。
　　
兼且最攞你命，係佢抽水！即未開閘，先在彩池方面抽起二十幾個巴仙，完全立於不敗之地，只等開乜，再睇殺幾多矣。
　　
更唔公平，已經N咁多人嘈到拆天，為一旦有騎師退出，投注立即化為烏有！呢個擺明絕不公平，由莊家通殺，點掂？故此，小弟絕不沾手呢項戇居投注，留返甘心畀人劏者玩！
　　
好嘞，「練馬師王」又如何？一定要睇馬會抽幾多水先？若果神神秘秘唔講，咁就唔好玩！
　　
明天「特首杯」，只買一隻「雙新人馬」，即十磅仔鍾易禮騎伍鵬志的「錶之未來」。四檔彈出狂放千二米帶返終點，捧WP！
　　
另研究第五場四班一千米，出足十四匹。專家教落，沙田一千米好難適應，故應選途程專家又賽前試閘出色的馬。咁就易，我會選四匹，「海豚星」、「嘉應精神」、「英雄豪傑」及「威妙星」Q、PQ互穿，另「威妙星」二重彩複式膽！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。