「大隻講」首相

政客競選，個個順口開河，講到天花龍鳳天下無敵。結果十之八九一上場，面對真實管治「慘況」，立即變「周身無力」。
　　
歷史顯示，凡民選上台的西方政治領袖（非民選的也多如此！），多數挾高民望上台，然後變中民望，臨落台，幾乎清一色低民望。
　　
非常典型例子為馬英九。選台灣總統時，小弟刻意組團過台灣參觀大型造勢晚會。其時，九哥真是萬人迷，去到邊都充滿巨星氣場。我在某夜市見證，人山人海向佢歡呼，不少女粉絲更喊晒想擠埋去擁抱，真的魅力驚人。
　　
結果又如何？當然跳不出高民望上台，中民望頂住，低民望下台的軌跡。
　　
今天馬英九，走在台灣任何角落，都只是一位皮膚鬆弛的阿伯，乜吸引力都冇晒矣。無他，因佢曾長期擔當一個力有不逮的角色，畀人睇穿佢，作為政治領袖，實在冇乜料到。
　　
唔知點解，我有種直覺，英國新首相卓慧思，正正有種「英國馬英九」型格。
　　
雖然佢刻意想模仿「鐵娘子」首相戴卓爾夫人。但可惜由頭到腳，由型格到眼神，由口音（非牛頓音）到氣場，都差五班，點可自攀？都幾肯定，佢根本不會有甚麼蜜月期，一開波，即被黨內黨外政敵砌到體無完膚。
　　
英國政治，換首相閒過立秋，個個政客都想上位過一下癮。故此，一有機會就「隊」你。
　　
唔好講咁遠，大家單單睇睇對上兩位首相文翠珊及「肥波」約翰遜，點畀人「隊低」，你就知，舉世政治，全皆凶險陰毒。好快，如今笑騎騎捧卓慧思的保守黨黨員，若一見自己可能有機會上位，肯定立即放毒蛇。
　　
小弟睇，呢個「儍白甜」妹妹型首相，真係有點香港俗語的「大隻講」作風。竟揚言上台立即：一、減稅；二、凍結能源價格；三、解決能源問題。呢三張期票，開就易，兌現就難過登天！正如香港某前高官講：「錢喺邊度嚟？天跌落嚟？樹生出嚟？」金融市場明顯「睇衰」佢，故出現英鎊狂瀉「賀」佢上台。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。