「發仔」變99倍

「發仔」係邊個？已經去世「新界王」劉皇發個仔劉業強是也。近年承繼父親「新界教父」大位，成為鄉議局主席、行政會議成員及立法會議員，在新界幫中，權傾一時。
　　
可能自覺走勢愈來愈勁，故希望再下一成，躋身馬會最高決策階層——董事局。故此，今屆大鑼大鼓去馬選董事。
　　
全世界任何選舉，都有各自「遊戲潛規則」，唔識玩，多數碰得一鼻子灰。就算西方世界，包括美國與英國，細心研究其選舉制度，也是被既定勢力壟斷，外人潑水不入。想玩？必須先循底層開始打入，慢慢逐步爬上，直至一眾黨內「大佬」認可，才有機會出頭。
　　
過程中需要經歷N咁多政治游說、交換、鬥爭……除非你完全「新嚟」，否則冇理由唔知。
　　
馬會董事局又如何？百分之一千是這樣。成個權力架構有百年計歷史，加上並非開放，故其牌面與牌底規則，如老樹盤根。任何外來力量想滲入，唔係唔得，但當然要經長時間游說、交換、鬥爭……再多一樣，你對馬會過去、現在及將來，有幾大貢獻先？
　　
首先，潛規則就是查三世書，睇睇你的背景、你的出生合唔合要求。用賽馬術語就是——你有乜血統？
　　
馬會一百數十年建立的勢力範圍，一直是英國幫、華人大家族幫及英資專業幫（尤其法律及會計界）組合而成。大部分成員住在港島南區及半山區，同聲同氣，有相同文化、價值觀及利益背景，早已連成一體。故此，馬會的董事局，素來也是「政治協商」選出，外人不得插手。
　　
今次出現「選董事血戰」，走訪咗不少有投票權的遴選委員，綜合意見：一、發仔想選，無可厚非，但策略錯誤，只懂急功，偏偏大董勢力圈完全不吃這套。二、發仔想選，其實應用最少十年時間鋪關係，先被接納是「自己人」，才提出參選；三、如今發仔「硬入」，方法惡睇，必被傳統勢力彈走，未來幾年都難有機會嘞。
　　
今日投票，看台話九十九倍，輸硬！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。