貪平客食乜

所有認識我者，皆知小弟為食，故此一有好嘢，必立即推薦。通常聽落吸引的，只要不是在山旮旯，我一定安排日子、時間，呼朋引類去試，以免走雞。過往經驗，試十家，總有三、四家合水準，當中又會有一兩家值得介紹外，日後我更會再去，甚至成為熟客。

但有一種「熱情推介」，從不會試。係乜？正是超級難以想像的抵食餐！

近日各大飲食集團為賺盡人人有分的消費券，紛紛在周五六日大登廣告，以極吸引的價錢拉客。例如：一、加拿大珍寶蟹（二斤六両）二百八十八元；二、原隻上湯美洲龍蝦（伊麵底）一百八十八元；三、本地香妃雞一隻五元；四、石岐燒乳鴿一隻一元；五、明爐燒乳豬一隻二百三十八元。

以上價錢，除非你是「堅離地」的消費者，否則應知根本冇可能咁嘅價錢食咁嘅嘢，因為材料成本都唔掂，更何況要燈油火蠟人工鋪租……

基本智慧，咁大隻蛤乸隨街跳，一係先引你入酒家再劏，找數時妹仔大過主人婆。

另一就係畀「垃圾」你食。

小弟食勻港九，自己經營過酒家，也與不少食肆老闆及大廚相熟，當然知道行內運作實況。佢哋個個唔係做善堂，為乜要貼錢畀你歎？其中當然有個局，你貪，就啱晒。

在鯉魚門開海鮮酒家的老友A，講過一點普通常識我聽：「碌Sir，通常一手海鮮來貨，無論魚蝦蟹或其他海產，大致上分三種狀態。頂級生猛游水；次級呆下呆下就快變『神仙』（瓜得）；低級則已經瓜咗，但仍未發臭變味。」

各位，你話嘞，邊種客食邊級呢？當然係熟客VIP願付合理價的，食生猛高質海鮮。次級就畀普通客食。低級的死魚死蝦死蟹，就畀貪平，尤其旅行團客食。廚師會用大量化學品醃製，入味後，一係上漿炸到卜卜脆，一係加入大量酸甜汁及番茄、辣椒，做咕嚕斑球之類。

總之，小弟搵食鐵律，不合常理的平價食物，一律咪搞我。你想食就食到夠！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。