老闆誤殺接班人

老友大隻B乃「中上層打工王」。即係點？即係長期遊走各大集團，屬專業人士，故家家公司渴求，但又不是做CEO材料，所以，不用孭大飛。但因經常開管理高層會議，故對公司政策、辦公室鬥爭、老闆心態，全部得知，幸而唔使被捲入，都好過癮。

昨晚啤啤佢，爆出好多香港著名CEO的真實面目，個別都幾台前幕後兩個人。

例如某上市大集團CEO阿王（假名），經常公眾曝光，次次斯文淡定，好有教養及品味咁款，加上必穿保守名牌西裝，黑框眼鏡，客客氣氣，故營造出一個與人為善的「好好先生」印象。

實質係點？B哥微微嘴話：「佢真人剛剛與公眾形象相反，心胸狹獈，心狠手辣，舉個例你聽就知！」

話說阿王集團老闆為香港著名富豪，生意多到不得了，旗下有N家大小子公司，故需日理萬機。為加強集團實力，不時在外挖角，某次挖咗一個叻人阿陳，準備捧佢做公司CEO，然後再將阿王調升（或暗降）睇多瓣。

開管理高層會議時，老闆當住所有行政主管面前講：「各位，今日介紹新CFO同事陳先生大家識。王總裁，公司準備稍後再調升你，希望你用半年時間栽培陳先生，好等佢順利接任你目前的CEO位！」

嘩嘩，老王一聽，眼神一轉，微笑點頭：「好好好，公司需要多啲能人接班才會壯大。我將好好與陳先生合作，老闆，你放心可也。」

大隻B當時在場，佢感到老王一邊講，一邊氣氛已現不尋常，同場高層也你眼望我眼。

散會，老王先笑嘻嘻，在老闆面前邀請老陳晚飯直落，介紹工作，然後搭住膊頭離開會議室。

之後點？犀利喇，開始兩個月的CEO日日折磨CFO，在高層會議中頻頻出招為難侮辱，誓要盡快將「接班人」謀殺。

結果？新來的，哪來基礎與舊狐狸鬥？其他高層也西瓜靠大邊，冇人會咁儍向老陳施援手。

於是「未來CEO」兩月被陰乾，請辭而去。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。