羅文嚇到我標尿

真係服晒音樂會製作人蕭潮順。點解？因佢不似多數音樂會投資者，眼中只有個$符號。

過去三年，乜都停晒，完全冇收入，佢竟仍咬緊牙關，不斷為市民打氣，搞咗兩個綫上免費演唱會，分別由許冠傑及郭富城擔綱演出，位置刻意選擇海港城大露台，兜心口望住維多利亞海港唱，以喚起香港人齊心抗疫。

我睇到佢份使命感，無法唔寫個「服」字。

認識蕭仔N年，見證佢經常低調做「大義工」，尤其樂壇經典人物的白事，更義無反顧攬上身。例如當年政府大球場進行的「黃霑追思會」，正是最有代表性的一個，幕後付出的汗水，足有一大桶，但佢從冇提及。

人緣及江湖地位，就是如此一點一滴地建立。故此，當要搞具意義的活動，經常可以一呼百應，因大家了解佢為人，多數一句「唔使講嘢」就支持！

最近疫情稍斂，佢又孭起製作羅文逝世二十周年演唱會（嘩，果真時間飛逝啊）。

呢類大製作，不但要求多位巨星捱義氣演出，兼且也不能做幾場，所以，咪講賺錢，能否收支平衡也是個大問號。

不過，蕭仔就是對樂壇經典人物有份尊敬，話做就做，話孭就孭，扑槌去馬！

講起羅文，我有段嚇到標冷汗（包埋尿？）的經歷，沒齒難忘。

話說一九七八年時，羅文紅到爆表，但當時仍未有紅館，舉辦演唱會，只好選在利舞台（已蒸發）。

當時《歡樂今宵》總指揮吳慧萍出任演唱會監製，得知小弟晚晚EYT後，走去香港電台做通宵DJ，於是拉住：「碌，你嚟羅文演唱會做報幕啦！」

以為好簡單，點知……演唱會完結，羅文退下，全場狂嗌Encore。我以為佢打個白鴿轉就再出場，點知唔係！撚足五、六分鐘仍未出，咁就死得。我這個戇居幕後MC可以講乜？腦袋一片空白，只能似跳綫唱片咁，不斷重複：「各位，有請羅文！各位，有請羅文……」

你話嘞，咁渣斗，自己都腳軟啦，瘀到爆！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。