古仔頸椎留患10級痛 青雲傷腳花9個月康復

古仔、青雲拍《明日戰記》搞到周身傷，但都覺得非常值得。

（星島日報報道）由吳炫輝執導、古天樂（古仔）及劉青雲主演的科幻電影《明日戰記》明日上映。這部耗資4.5億港元拍攝，被喻為「香港有史以來最具規模科幻巨著」，當中有不少打鬥場面，古仔與青雲早前為電影接受訪問時就坦言為部戲搞到周身傷，而古仔更要用嗎啡止痛。

古仔與青雲在戲中均要穿上重達33磅盔甲拍攝，古仔笑指穿上盔甲後很不方便，連洗手間都不敢去，再加上要穿上盔甲後吊威吔，故拍完整部戲後亦瘦了約10磅。至於青雲就直言拍得好吃力，又透露在拍攝初期右腳腳掌因吊威吔時彈跳而受傷，更花了9個月時間康復：「點解要9個月，因為整親之後仲要拍。（拍呢套戲覺唔覺得係大整蠱？）唔係，我之前拍《神探大戰》都辛苦，要着7件衫。（邊套辛苦啲？）呢套都辛苦，因為天氣熱，着住套盔甲唔止拍到底褲濕埋，盔甲都倒得出水。」青雲指雖然拍攝過程辛苦，但一切都很值得，因為能見識到很多未接觸過的事，直言覺得好玩的他更表示有機會亦不介意再拍科幻片。

嗎啡止痛 赴美手術

至於古仔則指拍攝時沒有受傷，但拍完兩年後頸椎出事，更痛到要用嗎啡止痛，最後更要去美國做手術，將兩節頸椎骨換成鈦金屬：「應該係長期着住件衫（盔甲）有關，當時醫生問我1至10級痛係幾級痛，我話係10級，瞓覺冇得轉身，得一個位置瞓到，我係長期痛，痛到要打嗎啡。」青雲聽罷後即取笑古仔說：「唔怪得之你長期黑口黑面，咁你𠵱家咪好硬頸？」古仔又笑指做手術前，醫生突然要他簽字，搞到他以為要簽生死狀：「當時瞓咗喺（手術）牀，麻醉師突然要我簽多份嘢，我嗰陣打咗麻醉針已經暈暈哋，我以為係生死狀，原來係開刀之後，如果有發現其他位置有問題，要你授權先可以做多節。」

一向熱愛科幻片的古仔，被問到是否已把所有喜愛的元素如機械人、戰機及盔甲等加入電影中？他坦言：「我最鍾意嘅外星人都未放入去。（續集加外星人？）續集就要睇埋呢套反應先。」對於導演曾指古仔在片場時除了要演戲之餘，更要兼顧監製工作，搞到好像精神分裂一樣，他坦言不止精神分裂，而且更拍到崩潰：「因為個景好大，好多事要處理，稍有差池、啲嘢又要由頭嚟過，例如拍攝CG鏡頭用嘅綠布，買到綠布冇晒，要自己染，拍完都唔知點處理啲綠布。」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。