Juicy叮｜遇「極品」應徵者爆火花 人事部員工反惹網民一面倒批評

機構的人事部職員見盡各種各樣的應徵者，應該見怪不怪，然而也會出現異數！有人事部員工早前在網上發文，稱近日遇到一名多年未有工作的「極品」應徵者，在面試過程中，對方最終「直接拍枱執嘢走人」，人事部員工直言「香港竟然可以有人極品成咁都真係第一次見！！」不過，發文者的言行卻不獲支持，反引起網民一面倒的批評。

該名人事部員工在facebook專頁「奴工處」投稿指，近日遇到一名「極品」應徵者，對方未有工作多年。在面試期間，對方自稱多年來「去網吧打機，或者去Ｍ記hea到等夠鐘」，亦未曾做過兼職。樓主隨即詢問「咁你係咪諗住成世唔使做嘢？」對方回答指「有冇嘢做我控制到架？你估兼職又一定請咩？如果係，邊有人失業先？」樓主聞言後直言「你有手有腳又唔係殘廢，邊有可能搵唔到嘢做？唔好話你廢喺度搵藉口！」

沒料到，對方即反駁說「不過其實唔做嘢有咩問題？依家法例規定一定要做嘢？同埋邊有人一開始就有經驗？你唔畀機會又何來有經驗呀？」他續說，「香港就係多得你呢啲老屎忽思維，成日奄尖到自以為可以揀到最好，點知又眼高手低，又歧視人空白期，難怪成日聽到有人唔想返工或者有人搵唔到工，結果咪成日搞到請錯人或者有人劈炮，甚至搞到要炒人再請人囉！另外如果香港少啲好似你呢啲咁既奴性思維，我都幾肯定呢個香港冇人失業囉！」樓主反問「你意思即係賴社會錯啦」，又直斥「社會垃圾真係歪理連篇」，對方隨後回答「咁你串得我唔做嘢，我都已經預咗冇行」。樓主形容，對方隨後「直接拍枱執嘢走人」，樓主直言「香港竟然可以有人極品成咁都真係第一次見！！」

相關帖文隨即引起熱議，不少網民批評發文者的言行，直言「其實求職者又無講錯…無做野咪無做野，做咩要同你交代原因？」、「求職者佢又唔係全錯喎，雖然佢態度唔係太好，但in人都唔係咁嘅態度，佢無欠你嘅」、「hr哥位似極品多啲喎」、「其實佢唔係有心搵工做野都唔會上嚟in，hr 做咩玩人身攻擊？」等。另有網民則反問「睇完cv仲in?」、「咁你又見？」等。

帖文來源：「奴工處」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。