古天后日志｜市场憧憬减关税 港股料重上二万二

7月5日，大致多云，有几阵骤雨，局部地区有雷暴。隔晚美股假期，欧洲股市向好，道指期货做好，港股期货喺新加坡亦做好，预计今日港股应可以重返22000水平。通胀继续影响住全世界嘅企业，即系加息系各地央行无可奈何要继续执行嘅一个货币政策。不过近日欧美股市反弹，好明显系市场眼见喺通胀威胁之下，企业生意难挨，经济有陷入衰退嘅危机，如此一来，本来收紧嘅货币政策，或需要作出调整，由收紧再次转向放松。

至于事实是否如此，古天后则有所怀疑，因为高通胀对经济嘅威胁未解除下，央行一旦放水，令通胀进一步失控，企业经营只有难有加难。不过美国方面，除咗以加息去控制通胀之外，另一个可行方法，就系削减关税，以抑压从外部输入嘅通胀压力。有消息指美国方面最快会喺今个星期内宣布取消对部分中国消费品加征嘅关税，此外仲可能启动一项针对行业补贴新调查，但留意科技等战略领域关税或被提高。正因为呢个消息，中美股市炒上。

至于中港股市呢边，同样面对通胀问题，但由于内地实行计划经济，当民生用品价格持续上升，阿爷会以行政手段控制，最新鲜热辣嘅就系管到去猪肉价格，试图以行政手段控制猪肉价格升幅。睇返A股喺7月首个交易日做好，暂时保持强势，主要靠外资积极入市，㖊日外资就买入咗超过70亿元A股，呢个系近日A股上升嘅主要动力。

恒指22500阻力仍大

恒指方面，㖊日早段一度回落至21500水平之下即迅速反弹，最终恒指㖊日报收21830点，成交1314亿元唔算多，暂时恒指仍然喺区间内移动，22400至22500嘅阻力仍大，不过每次回调底部却呈一浪高于一浪嘅状态，要做淡基本唔容易，但喺浪顶再做好，值博率却相当有限。

最大问题系指数权重嘅腾讯(00700)，主要股东已表明减持，虽然未有明确指示要沽几多货，但至少咁大批货要待价而沽，腾讯自然都唔升得去边，就算市况向好，都只系跌唔落。至于另一重磅股阿里(09988)，喺CCASS见到高盛接咗大批货，系咪主要股东搬定货过嚟香港呢边，随时喺市场沽货，抑或部署批股减持，暂时不得而知，但咁大嚿货摆得喺CCASS，又点会无行动。而美团(03690)就未见CCASS有太大变动，但美团近日已成为大户舞高弄低数嘅工具，大市日升日跌，美团亦如此。

古天后

(徐狄怡，证监会持牌人)

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。