霍汶希北漂11年堅持信念 從低做起學做場記買飯盒

英皇娛樂集團營運總裁、著名經理人霍汶希（Mani）最近接受媒體推出的《你好香港》系列人物微紀錄片訪問，解構經理人角色，以及分享北漂11年的感受。Mani謂經理人唔易做：「經理人嘅生涯，就係由藝人起身之前我哋就要起身，藝人瞓咗覺之後我哋都唔可以瞓覺，因為我要安排佢第二日嘅工作。呢個就係經理人嘅節奏，做呢個行業你就預咗冇收工時間。」她坦言自己大部份時間都是一個比較主動爭取機會的人，因此2011年時已捧紅謝霆鋒、容祖兒及Twins等藝人。

 

Mani北漂11年，返內地發展時從頭開始。

Mani捧紅謝霆鋒及容祖兒。

 

曾感慨又有點迷惘

Mani認為其經理人板塊已經愈趨成熟，是時候擴展版圖：「好想去一個更加大嘅地方、更加大嘅市場，去睇吓人哋嘅文化，睇吓人哋嘅發展。我好希望將香港嘅文化，去同內地咁大嘅市場一齊融合交流，呢個係我好想做嘅嘢，咁就嚟咗北京。」回想起當年「上京」，公司也只是租回來，她踏入辦公室時，乾淨得一塵不染：「我張枱好乾淨、塵都冇，得一支筆，我突然間好感慨，你明唔明白呀？又覺得我有冇咁嘅能力，可以從一支筆開始慢慢去建立？呢個時候我係有啲迷惘，但係我都仲係好有信心。」

在香港已不需再親自落場處理事情的Mani，到內地卻變成一張白紙，所有事都要從新學習，放下身段從低做起：「我唔識製作，所以我去跟組，跟組其實我喺香港，好老實講我已經完全唔可能（去做），但我就同自己講，『你就從低做起』，每一日好似場記咁，執垃圾嘅執垃圾，食飯盒會問大家飯盒夠唔夠？從每一個部門、每一個唔同嘅工種裏面開始觀察，點樣控制成本，知道電影製作背後係原來咁多人力物力去產生出嚟。」

 

Mani表示最初到內地，辦公室內的枱上只得一支筆。

Mani透露當時每一日好似場記咁，執垃圾嘅執垃圾。

 

努力去做個好榜樣

於北京工作的頭幾年，Mani從零開始一步一步建立：「正如我嘅人生一樣，我嚟咗北京11年，要堅持信念同要相信自己，我要努力工作，努力去做一個好榜樣，令鍾意我嘅人又好、俾機會我嘅人又好，都希望佢哋唔會感覺我係一個令佢失望嘅人。」

 

Mani堅持信念同相信自己，努力去做一個好榜樣。

 

星島新聞集團慶回歸25周年專題網站，請即瀏覽

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。