古天后日志｜美股跟中概股此消彼长  美股再跌吸引力胜中概

6月27日，大致天晴，间中一两阵骤雨，日间天气酷热。上周美股显著反弹，主要系资源价格下跌，令市场对通胀忧虑减退，上周五美股三大指数上升，道指升823点；标指跟纳指升幅更超过3%，两指数分别创5月18日及5月13日单日最大升幅。至于港股当晚ADR及夜期亦向上，今早喺新加坡黑期时段，无惧道指期货回吐，升抵21900水平。上周除咗美股反弹之外，加密货币市场亦见反弹，可见市场风险胃纳上升，市场游资充裕下，资本市场表现反复，6月美股好友受到多次考验，淡友亦唔见得有好日子过，好淡通杀令美股投资者无所适从。

联储局明示续加息收水

无论美股抑或其他股市，5月未见穷，6月亦唔绝，咁嘅情况下，自然亦唔会有乜嘢7翻生。6月半年结，美股喺现水平半年结，基金经理当然乐见美股可以喺半年结企住喺现水平，不过下个月至8月，美股又步入业绩期，届时各美企一派成绩表，只要稍有差池，高估值股份难免又要挨沽。喺高通胀下，6月嘅消费者心指数，已由5月嘅58.4下降至50，高通胀打击消费信心，零售下滑必然对经济带嚟下行压力。唔单止消费下行压力大增，联储局亦明示为咗控制通胀，会继续加息收水。

不过，当经济实况转为疲弱时，央行又会稍为松手，欧央行已表示要一边加息控通胀，但同时唔会收紧货币政策，甚至要继续QE，以保市场流动性。呢啲睇落系精神分裂嘅行为，令各地股市喺熊市中屡见反弹，令投资者渐渐迷失方向。

至于港股亦喺不知不觉间，一步步重返22000水平，但期间未见成交增加配合升势，主要系市场唔见有新资金流入，只系靠北水喺唔同板块轮动，反映内地资金更乐于买入A股多于港股。当港股跟美股出现此消彼长嘅情况，美股跌，港股反而跟住内地股市回升，两市重磅科技股估值拉近，甚至系美股嘅重磅科网股估值变得更吸引时，资金会如何取舍，聪明嘅投资者自然识拣。

喺目前古天后仍然系等待紧美股反弹过后再出现嘅另一次调整，一旦美股再出现急跌，唔排除会将更多资金投入美股寻找机会，皆因喺相约估值嘅情况下，美企所面对嘅政策风险远低于中资企业，话就话内地对科网股嘅监管已告一段落，但阿爷嘅心思又岂能轻易猜量，既然如此，何不选择早已系统化，监管条文准测更清晰嘅美股市场，而要去追逐政策风险较高嘅内地股市呢。

古天后

(徐狄怡，证监会持牌人)

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。