古天后日志｜港股随美股反复 现水平上博空间有限

5月23日，多云，有几阵骤雨，间中有几阵强风。上周五美股表现反复，道指高开后曾倒跌逾600点，至尾市三大指数收复失地，道指回升8点；标指升不足1点；纳指则跌33点。目前三大指数均跌至支持位守住，而虚拟货币亦见回升，似乎资金避险情绪略减，问题系有几多资金愿意入场。预计美股表现仍反复，主要睇资金流动性会否喺6月联储局缩表后受影响，暂时古天后对美股后市预测仍然较为保守。

至于港股于月初曾至19200水平后反弹，呈现双底回升形态，可惜入市资金一直唔多够，暂时反弹阻力都系20800至21200较大。目前大市喺20600点水平，似乎向上值博率已大减，大市美股表现反复，日上日落，下周一期指结算，既然月底已成功捕捉一轮调整，古天后亦有建议喺19200水平入货，目前好应该分段食糊锁定利润去迎接6月来临。

恒地大型项目或成股价催化剂

大市由月初见咗19200点水平上返嚟，主要都系由一堆重磅科网股带动，但唔觉唔觉其实本地本产股亦由低位升返唔少上嚟。虽然美国息率趋升，加上早前第五波疫情，确系令本港楼市表现较为疲软，但始终本地住房需求远超过供应，喺刚性需求下，本地一手楼嘅市场唔会差得去边。随住疫情受控缓和，发展商最近又开始陆续推新盘，而第一季积聚嘅购买力，一下子又再释放出嚟，近期嘅新盘一推出市场，都火速售罄。

恒地(00012)最快会喺下个月推出近30年以嚟，最大嘅市区旧楼重建计划，上星期该项目已正式命名为“必嘉坊Baker Circle”。呢个项目由最初收楼至今，已历时超过20年，整个重建计划合共分为8个地盘，总楼面面积逾100万平方呎，将提供约2800个住宅单位，并按三期分段推出市场，并且享有999年地契嘅优势。

而呢个项目特别之处，系横跨咗红磡南嘅机利士南路、必嘉街、黄埔街、宝其利街，将呢几条街打造为一个设计独特、楼面面积约168,000平方呎嘅立体商业步行街，恒地想将该区打造成另一个吃喝玩乐新蒲点。而最近港铁东铁线过海段已正式通车，令红磡区成为全港交通枢纽嘅重要角色，而“必嘉坊Baker Circle”项目正正落于红磡站、何文田站及黄埔站三站之间，可以话占尽铁路网络优势。

恒地都有一段时间无咁大型嘅项目推出市场，呢个项目落成后，除咗售楼收益之外，未来商业步行街亦会为集团带嚟可观嘅租金收益，相信对股东回报有正面刺激。睇返恒地嘅股价走势，目前喺32元水平附近徘徊，表现相对其他重磅股落后，红磡项目嘅推出，有机会成为股价短线催化剂，值得留意。

古天后

(徐狄怡，证监会持牌人)

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。