【合體做live騷】黑妹送勵志歌畀林子博老婆  肥媽為老公不適爆喊

2017年11月肥媽跟黑妹姐(李麗霞)曾喺新伊館舉行咗個《黑．媽媽笑住唱》香港演唱會，年多後兩人入紙申請再做，原先批咗喺今年二月情人節檔期合體，可是受疫情影響，兩人早已取消booking，不過，觀眾一直都好期待。黑妹姐之前應邀喺肥媽youtube頻道Easy cook度學煮餸，兩人重提合體事，興之所至話搞個live show，結果昨晚終於「找數」，兩人喺樂隊伴奏下唱足兩個鐘頭，吸引二萬多觀眾收睇，亦有觀眾課金點唱。肥媽盡顯巨肺本色嚟演繹，黑妹姐雖然肺癌做過手術，但唱歌不受影響，反而戒煙後，仲顯靚聲。

當晚兩人演繹觀眾點唱嘅經典金曲《故鄉的雨》、《蔓珠莎華》、《夢想號黃包車》、《萬水千山縱橫》、《Monica》、《冰山大火》等，當肥媽唱到蘇苪的《憑著愛》尾段時被歌詞感動得爆喊，肥媽說：「因為屋企有人唔舒服會牽腸掛肚。不過，好多人錫我老公，屋企人又好團結，所以係開心眼淚，人嘅一生起起跌跌都係磨練，我哋一定要正能量，堅持撐落去，我老公一定得。」

原來患有肺癌嘅Rick因為腰骨有啲唔舒服去檢查，照到腦部有微細粒粒壓住神經線，醫生驚塞住血管有機會腦充血，所以Rick兩周電咗個腦10次，電療後突然成個人down晒見暈，肥媽話老公好人好姐真係接受唔到，所以𠵱家她夜晚唔敢瞓照顧住老公，搞到面上長了壓力瘡。至於黑妹姐演繹勵志歌《總有你鼓勵》畀肥媽老公Rick及林子博老婆董燕君（Shirley），希望兩人早日康復。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。