【頭條獨家】《大醬園》首做男一無壓力 何廣沛攞正牌同朱晨麗談情

何廣沛(Matthew)演出的《黃金有罪》及首做男一嘅《大醬園》疊住出街，後者更和緋聞女友朱晨麗(朱朱)由歡喜冤家演到變夫妻，奉旨談情；而《黃金有罪》則愈拍愈灰，他帶笑投訴：「以往喺劇入面係愛情長勝將軍，女角會主動媾我，今次爭女神陳瀅輸咗畀洪永城，仲冇埋事業要自殺，真係好黑暗，唯一希望一死會感動到觀眾，好似張彥博喺《跳躍生命線》嘅「雄姐」咁爆紅啦。」採訪：方騫平 服裝：MYND

何廣沛形容自己喺《黃》劇中只係一名小配角，不過算係幾有發揮：「劇入面我係演正直警察，後期同恩師張兆輝關係決裂，爭陳瀅又唔夠洪永城爭，事業愛情都雙失。以前拍劇都被安排有條好靚嘅感情線，演嘅又係平步青雲角色，從未試過咁兜踎，好彩最後監製王心慰都可憐我，唔使我輸晒咁慘，畀返個靚女丁樂鍶我，同陳瀅比較，兩人各有各靚啦，陳瀅好男仔頭，不過佢嘅靚係公認㗎啦，所以我唔會再讚佢，有陳家樂讚就得嘞，(留返嚟讚朱朱？)哈！朱朱都好多人讚！」

最鍾意鬧朱朱
雖然同時間有兩劇出街，但何廣沛仍然對收視好有信心：「據過往劇集紀錄，我都係收視福將，好有劇運，演過嘅《親親我好媽》、《超時空男臣》、《跳躍生命線》同《白色強人》收視都係頭3位，而且《大醬園》係民初大劇，有好多資深演員分擔，相對冇咁大風險，首做男一唔會有好大壓力。最開心可以攞正牌同朱朱鬧交，我鍾意鬧佢咪鬧佢囉，唔使負責任，幾爽呀！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。