【頭條戲場】《白頭山：火山浩劫》特技好勁唔好駁戲

由《與神同行》系列導演金容華監製，以260億韓圜(約1.8億港元)天價製作的災難鉅製《白頭山：火山浩劫》在港上映一周票房已逾千二萬，輕易登上香港史上十大最賣座韓片排行榜第八位。電影屬典型災難片，火山爆發引致地震同海嘯，然後樓又塌路又裂，市民爭相走避，主角繼續超級英雄上身避過無數咁多劫。特技好勁好勁好勁，真心睇到驚，劇情嘛，睇呢類戲唔好駁戲，過癮就夠。(上映中) 撰文:廖思慧

白頭山進入休眠狀態差不多1000年，03及04年曾發現地殼出現裂紋，不少研究人員稱必定會發生大規模爆發，衝擊力較2010年癱瘓歐洲的冰島火山爆發強1000倍。

河正宇由頭跑到尾

電影有五粒大星撐場，河正宇飾演南韓EOD爆破隊成員趙仁昌，而李炳憲係北韓軍事情報軍官李準平，馬東石今次唔做猛男做地質學家姜奉萊，曾預測白頭山將會再次爆發，所以一直研究應對措施，但當然無人理佢。

另外兩星就係飾演河正宇老婆嘅裴秀智及飾演南韓總統首席秘書嘅田慧振，其實仲有客串一場，收得好埋，飾演李炳憲老婆嘅全度妍。大星加災難點會唔好睇?因為會摧毀南北韓的白頭山爆發，姜奉萊提出可以阻止爆發的黐線方法，原本退役的趙仁昌被迫臨危受命，要去北韓搵李準平收集核武情報去阻止浩劫發生。唔好問點解河正宇可以跑贏地陷速度，唔好理大肚秀智點做到游贏海嘯， OK?戲中河正宇由頭跑到尾又要負責搞笑，辛苦晒。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。