【謝氏揈蕉法】霆鋒爆老竇攞蕉扮槍　謝賢揈前「咪一咪」蕉椗

謝霆鋒主持內地節目《12道鋒味》，日前網民在節目中搵到唔少搞笑位，例如炮製淋過毛巾嘅雞蛋仔、在食物前磨刀加「鐡粉」等，當中霆鋒無厘頭chok爆揈蕉，令網民搲晒頭「點解唔可以好好地搣蕉皮？」

原來揈蕉有段故，《12道鋒味》的面書專頁上載霆鋒同老竇謝賢（四哥）在漫天飛雪下，拎住成大梳蕉，講解點解要揈蕉，並搞笑Hashtag「#帶住黑超fing住蕉 #既然咁多人問 #謝氏fing蕉法」。

霆鋒一開波就話：「我一定要解釋畀你哋聽究竟呢個香蕉係點嚟嘅，即係點剝吖。」然後霆鋒望實四哥問：「你記唔記得我細個點樣引我笑，教我開香蕉先？」凍到震騰騰嘅四哥猛話唔記得，霆鋒再解釋兒時四哥攞起香蕉當揸槍，扮西部牛仔氹自己及阿妹謝婷婷笑，仲大讚四哥開蕉開得好有型。

霆鋒一邊講，四哥一邊玩揈蕉，仲分享心得，指揈蕉前要先在香蕉椗位用手指公「咪咪佢」，整開蕉皮先能夠揈蕉，可惜拍片用的香蕉太生太硬，講明熟的蕉皮先至容易揈開。

講開兒時兩仔爺的相處點滴，霆鋒一輪嘴大爆四哥的型棍事，有徒手開合桃、用匙羮及、筷子完美起原個椰青肉。霆鋒講到眉飛色舞，心入面明顯讚嘆四哥的「絕技」，仲講定下次要分享四哥起椰青肉的片。段片引到萬二個Like，網民留言揈蕉故事好Sweet，亦有人笑指「四哥好凍喎」、「四哥喺個仔面前變乖豬」、「 兩父子企埋一齊後興奮程度好似兩個大細路」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。