经济下行、AI燃起战火：in-house可持续发展团队的硬仗｜林一一

上个礼拜，一位喺大型蓝筹企业做咗五年可持续发展嘅朋友约我饮咖啡。佢打开电脑，俾我睇内部AI系统写出嚟嘅气候披露初稿：四大支柱齐晒，格式工整，中英文几万字嘅草稿，廿分钟就搞掂。但佢冇半点如释重负，反而一脸倦容，苦笑住同我讲：“一一，好多人以为有咗 AI，我哋做ESG嘅人可以半日收工。但我今年返工，辛苦过以前十倍。”

“以前辛苦喺码字，而家辛苦喺揾团队价值。AI帮我整理数据、写报告，但追数据𠮶种折磨，一啲都冇少。最头痛嘅系，老细今年订嘅可持续发展蓝图虚无缥缈，预算仲要削三成。我每日夹喺管理层同前线之间，真系唔知自己做紧乜。”

1. AI悭到打字时间，悭唔到协调功夫

唔少人以为，只要将大型语言模型放入工作流程，团队就可以好快收齐数据、整理资料、完成报告。但做过前线嘅人都知，事情冇咁简单。

AI可以帮手执格式、修文字，却唔会帮你追电费单、游说采购部索取供应商嘅碳足迹，亦唔会帮你同工厂协调用水数据。物业部可能啱啱转咗系统，一时揾唔返资料；采购部怕供应商加价，唔想开口；前线主管忙住守住营运目标。呢啲牵涉部门利益同人事磨合嘅工作，分分钟要做几个月，AI又点会代劳？

文字生成愈来愈快。大家终究要面对一个更根本嘅问题：经济转弱、资源收紧，ESG喺企业入面到底有几重要？

2. 蓝图愈宏大，前线愈唔知点做

朋友最苦恼嘅，系策略传到执行层，方向就开始走样。景气好𠮶阵，管理层比较容易作出具体承诺：几年内换几多部电动车、几时攞到绿色建筑认证，或者投放几多钱做节能改造。但而家盈利受压，董事会仍然想喺资本市场维持“负责任企业”嘅形象，却唔愿意作出明确嘅财务承诺。

于是，蓝图愈写愈宏大，内容却愈嚟愈含糊：“稳步推进绿色转型”、“兼顾商业价值与环境可持续发展”、“打造低碳韧性生态”。字字铿锵，听落好似有方向；但落到实际工作，边个负责、几时完成、需要几多资源，就一概欠奉。

呢种处境，令人谂起诺贝尔经济学奖得主Oliver Hart提出嘅“不完全契约理论”：外在环境愈唔确定，目标同责任就愈容易留白。决策权仍然喺管理层手上，执行嘅困难同代价，却落到团队身上。in-house可持续发展经理于是要将高层嘅宏观方向，拆解成物业、采购、工程、人事等部门做得到嘅日常工作。上面方向唔清，下面无从落手；团队夹喺中间，只能喺迷雾入面摸索前路。

3. 资源愈紧，合作愈似零和游戏

方向模糊已经够难搞，预算同人手再大减，更加系雪上加霜。组织行为学者理Richard Cyert同James March提出“组织冗余”嘅概念：企业资源充裕𠮶阵，各部门仲有少少余裕去试新做法。𠮶时推动ESG，业务部门可能只系多花少少时间同资源，就可以换到企业形象同报告成果，大家尚且肯配合。

但预算一收紧，各部门都要守住自己嘅损益表。可持续发展团队手头资源少咗，仲要叫前线额外孭减碳目标，甚至多花钱买环保物料。对前线主管嚟讲，问题已经唔系理念啱唔啱，而系成本由边个埋单。

“我连出年可唔可以保住人手都唔知，点解仲要替一份报告孭KPI？”朋友呢种谂法，一啲都唔难理解。部门之间嘅协调，于是由合作变成拉锯，日日磨、日日拗，没完没了。

4. 指标失真，合规流于表面

目标含糊、资源又不足，前线自然会拣最容易交差嘅做法。呢个正正系Charles Goodhart提出、我都成日借用嘅定律：当一个指标变成目标，佢就可能失去原本嘅参考价值。部门开始交最容易揾、最容易修饰嘅数据；企业就忙住熄走廊灯、搞环保讲座、净摊，务求令报告睇落有嘢交代。AI可以喺15分钟内，将呢啲内容写得流畅又严谨；但工厂排放未必因此减少，企业应对气候风险嘅能力亦未见得有提升。

咁系咪代表企业嘅in-house可持续发展团队已经行到死胡同？

第一，将宏大蓝图拆解成计得到数嘅商业选择。管理层唔愿意承诺，往往系因为睇唔清成本同回报。可持续发展经理唔可以净系等指示，而要帮管理层逐项计清楚：预算削三成之下，有边啲流程改善可以减碳，又唔使增加资本开支？有边啲合规要求如果唔早啲处理，可能会影响融资条件，甚至带来监管成本？当减碳方案讲得清融资成本、营运效率同风险管理，管理层先容易判断资源应该放喺边度。

第二，令减碳成果同部门利益挂钩。前线抗拒，往往系因为减碳目标由佢哋承担，成本却入咗自己部门嘅损益表。净系开会、催数据，好难改变呢个局面。可持续发展团队可以游说管理层重新设计诱因，例如用内部碳定价，将节省落嚟嘅碳成本转成部门资源；又或者将可以量度嘅减碳成果，纳入业务主管嘅考核同奖励。当前线睇到减碳同自己部门嘅目标有关，先有机会由被动交差，变成主动揾方法做好。

饮完咖啡，我同朋友讲：“作为企业内sustainability嘅主导者，净系识讲sustainability系无用。当你几时识得用商业营运嘅语言，同老板表达sustainability嘅问题，你就几时揾到你企得最稳嘅位置。

做的好嘅可持续发展顾问，永远应该系通才，专才只会令你困系塔内。AI写完报告，真正嘅硬仗，先至啱啱开始。

林一一