金多宝｜Edan“暖男式”求爱冧另一半 追女仔太进取吓亲钟雪莹 组萤幕情侣揾银
吕爵安（Edan）、钟雪莹在贺岁片《金多宝》组萤幕情侣！故事中，钟雪莹忘记帮嫲嫲买金多宝令$8,888万头奖落空！为免让家人失望，她在片场同事Edan协助下，以借来拍摄用的豪华别墅作新居，让一家人入住，两人就在过程中互生情愫，闹出笑话连篇。撰文：李志宏 摄影：谭志光
吕爵安Feel到钟雪莹内向
提到有观众大赞两人非常合拍，Edan附和：“多谢大家钟意我哋嘅火花！”钟雪莹希望这对“萤幕情侣”继续“行”落去，一齐商演揾钱。人与人之间有种解释不了的连结，Edan︰“记得拍《金多宝》第一日，我见到阿雪就feel到佢内向，我都唔系主动嘅人，我哋一开始好少倾偈。”钟雪莹︰“喺片场冇我戏份时，我就喺旁边睇拍戏，或者揾个位匿埋！我发觉Edan都系咁！我哋大概知道对方嘅运作模式。”
吕爵安角色好Kam
Edan续说︰“今次合作好舒服，同阿雪好夹，我哋共通点就系认真，唔系指木口木面，系似战友做group project，大家都想推高少少成件事嘅效果。我哋成日讲呢场戏‘试吓咁玩啦’！”拍惯综艺的他形容，“编剧喺我角色对白上花咗唔少心机︰内容、节奏，仲有身边人对佢嘅反应，我角色Kam Kam哋㗎！我成日提醒自己要将𠮶种feel演出嚟。”又例如有幕他扮地产经纪，自加土豪造型加乡音，好笑度加分；反而钟雪莹称：“我经验少，拍笑片会担心嘅，幸好今次搞笑高手太多，有好多嘢畀我学！”
吕爵安谈择偶条件
Edan指其角色对钟雪莹“有求必应”，暖男会主动帮助她解决任何问题，他说︰“而现实中，我会着重沟通多过一味出手帮人。”谈择偶条件，“主要睇性格！睇双方系咪夹得嚟，有冇共同话题。”钟雪莹遇到异性像Edan般献殷勤，可会是“加分位”？她说：“我反而觉得咁样会麻烦到人哋！”原来她个性甚少“求救”，“可能我擅长解决问题，比较独立，一段关系希望以沟通为主，而唔系成日要人帮忙，若对方太积极太进取，我会惊！”
钟雪莹识填词好叻
《金多宝》是两人第一次正式合作，Edan︰“我同阿雪做过一出广播剧《微凉之夏》，各自留喺录音室，叫做有见面打招呼。印象中嘅阿雪好有talented，涉猎好多嘢，识填词又系影后。填词系我一世都唔会解锁嘅技能！”值得一提是片尾曲《万幸》由钟雪莹、李尚正填词，并由Edan主唱。
吕爵安难100%坦白
戏中提到一家人靠“呃呃𠱁𠱁”维系感情，钟雪莹看法是︰“好难做到事事完全披露，尤其对屋企人。《金多宝》嘅设定更加极致，除咗唔讲你听之外，仲会‘以为’对你好而说一啲理想化假话。某程度上‘讲少啲真话’可能系幽默嘅相处模式！”Edan︰“我唔信有人做到100%坦白，冇呢个必要。每个人有自己立场、空间。好似阿妈问你：‘冻呀！有冇带多件衫出街？’你冇但系会讲‘有呀’，免得佢担心。”
钟雪莹吁珍惜眼前人
由金燕玲饰演的嫲嫲串连三代情，钟雪莹说︰“表面上系用谎言盖谎言，搞出好多乌龙嘅故事。成家人好似疯疯癫癫咁，希望观众睇完会揾到小碎片，连结到同家人嘅记忆。”Edan联想到自己与嫲嫲的关系，“我系唯一男孙，佢由细到大都好锡我。近年各有各忙，一年见一次，所以我特别重视团年饭。”他提到《金多宝》的核心，“‘家人’系好独特嘅，你冇得拣。就算平时唔多联络，始终有血缘关系。故事中，以为有钱就能解决所有问题？根本唔系咁。反而最神奇系，当大家愿意互相关心，问题症结就慢慢会解开，喺矛盾中揾到爱。”钟雪莹总结：“个message就系珍惜当下，珍惜眼前人。”
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
