卢瀚霆乐做MIRROR队友“树窿” 预告演唱会性感尺度丨名人杂志
MIRROR成员卢瀚霆（Anson Lo）将会举行其第二次个人演唱会，预告会有高量跳唱及性感尺度，两年前放慢生活节奏，接触了大自然心态变强，成为MIRROR队友“树窿”的Lo点名团中2名成员最能够接收他的负面情绪。撰文：陈凯诗 摄影：谭志光
Lo于2023年举行的首个演唱会以“The Stage”为主题，事隔两年多，12月6日将会举行一连4场《ANSON LO "KINGDOM" LIVE 2025》，今次将延续这个概念，来一个升华版，以“KINGDOM”为主题，Lo解释道：“The Stage系讲属于自己嘅舞台，今次想升华少少，扩大个scale，所以叫做‘KINGDOM’，寓意属于Anson Lo舞台嘅国度系一件咩事，加上‘KINGDOM’呢个字有国度区域感觉，有一种民族色彩嘅art direction喺里面，所以今次就会以一个埃及主题去包含晒成个演唱会嘅theme。”
年初已积极备战
今次演唱会将以“跳唱国度”为核心，Lo指观众将会看到各式各样不同风格的舞蹈与音乐：“会觉得去咗一个空间，全部都系跳唱嘅，会系好high energy嘅一个表演，而跳唱部分嘅激烈程度会比两年前首个演唱会为多。‘KINGDOM’呢个概念我喺2025年初已经谂好，所以知道自己会有高量度跳唱，于是年初我会话想练气、跑步、做多啲Cardio，就系因为我预计到会激烈过第一次演唱会。”
早于年初已开始积极备战的Lo ，每星期会做3至5次gym兼跑步，务求以最佳状态示人，以前在跑步机跑步，但近半年开始跑街，Lo坦言：“跑步机好闷，我钟意跑街，喺唔同街道跑好有新鲜感！（有冇撞到人？）其实我唔知㗎，因为好多时我都好专注，塞住耳机听住歌，望住地下跑。的确试过遇到神徒或者路人，但好尴尬，因为我塞住耳机唔知大家嗌我，所以佢哋会拍我膊头。（有冇好惊？）都会好surprise，加上我喺跑步径跑，确保系好安全，所以听歌会播大声啲。”
预告性感尺度
Lo透露今次个唱会有不少与埃及有关的服装，设计相对浮夸大胆，当问到其性感尺度时，他笑言自早前现身新加坡的亚洲音乐盛会Waterbomb，穿上小背心的他，爆肌湿身跳唱逾半小时后，发现他与神徒（粉丝暱称）对性感的定义不太一致，Lo笑言：“所以我唔够胆再讲咩叫性感，但会有一啲大家想睇嘅嘢，想睇嘅程度。其实我个风格都唔系shirtless（赤裸上身），唔会去到唔着衫，会系若隐若现露啲唔露啲，大家入场睇就知啦！”
国际舞台获益良多
近来Lo先后冲出香港，除Waterbomb外，还出席了韩国音乐盛典《2025 The Fact Music Awards》（TMA）颁奖典礼担任表演嘉宾，获益良多的他︰“学咗好多嘢，亲眼见到好多唔同国家嘅前辈，佢哋喺后台准备好专注，keep住不停mark舞练习，一定系最佳状态先上台，喺侧边见到佢哋喺台上面唱歌跳舞，真系好大力，好夸张地好，其实都激励到自己，更加觉得自己好唔够，喺表演上面真系可以再做好好多。”
开骚全唱自己歌
Lo在首个演唱会邀来陈慧琳，蔡卓妍、Dear Jane担任嘉宾，问到今次会否有惊喜？他却大卖关子：“未知道，公司仲商讨紧请边个前辈好。（想请舞台皇者郭富城吗？）如果请到郭富城梗系好啦，希望可以，但嘉宾系surprise，到时大家入场就知。”
歌单方面他就预告今次会全部唱自己的歌曲，主要是因为自己歌曲都储够一定数量：“虽然唔系好多，但够开一场演唱会，同埋相信神徒都会想听我唱自己歌多啲。”
交代身体状况
Lo早前身体响起警号，并曾于6月入院做手术，他续交代身体状况表示：“其实手术本身schedule咗系演唱会之后先做。但因安全问题，发觉越早做越好，所以前排就做咗。（冇乜手尾？）希望冇啦，依家暂时顺利，身体应付到演唱会。”
今年7月Lo正式迎来了30岁，“30而立”的他自觉最大转变是成熟了不少：“尤其近排我屋企人搬咗，有一种望住屋企人开心，自己就会好开心，觉得所有嘢都好完美。譬如每一次去屋企人度食饭，见到佢哋屋企好靓，个景好靓，佢哋又会话住得好舒服，就会觉得就算要再努力赚钱，所有嘢都好值得，因为见到佢哋真系in the very good place，好满意依家嘅生活质素，我已经觉得好好，顿时都觉得自己大个仔啦。”
乐做队友“树窿”
除了照顾家人，Lo近年亦成为了MIRROR成员的“树窿”。Edan（吕爵安）早前在演唱会上，公开感激他一直以来的支持，并称Lo为“一生嘅好朋友”、“老best”。Lo坦言：“我都真系几照顾身边朋友嘅情绪，MIRROR队友时不时都会揾我倾偈，可能我本身系一个比较正能量嘅人。”他续指因为两年前自己生活节奏放慢，接触了大自然学会了感恩，心里有一种平静而变得更坚强，因此间中亦可以成为别人的“树窿”。
“树窿”也要找人倾诉
Lo指自己亦不会100%可以正能量，近来亦是他一个大压力的时候，除了出专辑，还有新歌、新歌MV、演唱会的事要忙，“全部都系我好重视嘅project，呢个时候我需要‘树窿’多啲，感到压力大时会找父母倾诉，未必会找朋友，可能朋友近排能量值都好低，我唔想加重佢负担，咁不如揾一啲强大啲嘅人，可以接得住你情绪嘅人，相得益彰。”目前在MIRROR当中Jeremy （李骏杰）和Jer （柳应廷）两位成员都是可以接得到他情绪的人。
亲选与神徒大合唱歌曲
7月在30岁生日会上，Lo与神徒大合唱《不可爱教主》，问到演唱会想跟神徒全场大合唱哪一首歌曲？ 他就选择了即将推出专辑的最后一首歌：“今次album歌曲排序系我自己排，我特登拣送畀神徒𠮶首歌放喺最尾，因为我觉得用我对神徒嘅爱，同埋神徒对我嘅支持，去包返呢一个我嘅career嘅国度，呢件事系好有意义，所以我好想大家钟意呢首歌，到时同我一齐唱，画面会好唯美。”
最后Lo感激很多扬言会“全勤”睇足4场演唱会的神徒，预告会送上专属厚礼：“睇晒咁多场嘅神徒，真系要赞，要畀个猪仔印你，我都好希望可以每一晚见到大家。”
化妆：Rainbow Chung @ Annie G. Chan Makeup Centre
发型：Denny Ku @ CHIC Private I Salon
服装：IT, BOTH 造型：PIPA Creative
场地：Lubuds Group, FWD House 1881
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
