港女车厢让座奇遇 精灵婆婆列两大接受让座守则 网民激赞：好人变老｜Juicy叮
能够笑纳陌生人的暖意，确是双向的幸福。有好心地女乘客昨日（19日）透露了一段港铁车厢让座奇遇，一位精灵婆婆列出了两大接受让座守则，第一项是一定要讲唔该，第二项则与落车有关，网民对此大表赞赏，形容“好人变老都系好人”。详情见下图及下文：
港女车厢让座奇遇 精灵婆婆列两大接受让座守则逐张睇↓↓↓↓
楼主讲述车厢奇遇
楼主昨日在社交平台Threads发文讲述这段车厢奇遇，指“今日非繁忙时间坐地铁返工，有个好老嘅阿婆渣住拐杖摇摇up up（岌岌）咁，我就让个位佢坐。个车厢之后越来越多人。忽然，个阿婆超大声同我讲：
阿婆：小姐唔该晒你！我下个站落车，宜家俾返个位你！！！！！！！！！！
我：婆婆我听到，唔使咁大声。
阿婆：我惊其他人听唔到，坐咗你个位呀！
咁个位唔系我私人拥有嘅，人人都可以坐，但呢个阿婆真系好识做人。
后记：我同阿婆讲起，佢话佢嘅阿婆朋友兴咁样：
阿婆：1. 如果有人主动让座，一定要坐，一定要讲唔该，千祈唔好搞到气氛尴尬；
阿婆：2. 落车前俾返个位让座嘅人，再多谢佢；
我：点解网上睇到嘅老人家，同你讲嘅差咁远？
阿婆：佢哋应该唔系我朋友”。
相关阅读：港女落马洲过境回程疑血糖低头晕 遇上好心人3大帮忙 一原因网上出Po急寻让座女
网民大赞婆婆可爱
回应的网民大赞这位婆婆的做法，形容“好人变老”、“好人变老都系好人”、“好可爱嘅婆婆”、“阿婆有借有还！”、“婆婆醒目又识做”、“呢个婆婆好得意”、“呢位婆婆就做得啱啦”、“可爱又好嘅婆婆值得尊敬”。
有人更加指出“婆婆好可爱，希望人人都以礼相待，少啲戾气”、“呢啲咪正常老人家囉，起码识讲唔该，唔系老奉”、“如果个世界多返呢啲老人家咪几美好，唔系恃老卖老”。
原来，不少网民让座时也遇过类似的可爱长者：
•我都遇过呢啲公公婆婆，成件事窝心好多；
•我上次都系，阿婆特登去捞我只手，确保我坐得返个位；
•我都试过让咗个位俾个老人家之后佢落车叫返我过去坐低；
•我都试过。不过我自己真系睇人嚟让。有需要一定让。战斗格阿婆一定唔让；
•我都遇过。佢只系坐几个站，落车前一定要我坐返个位先。咁咪几好，互相尊重；
•我都试过，孭住书包，个婆婆yap（正字为“𣚕”，招手的意思）我过去，话佢就落车俾个位我坐；
•我㖊日都有差唔多经历，我让位俾伯伯，伯伯一见到佢隔篱有位就叫我坐，到佢落车佢又同我讲唔该晒，呢位伯伯好可爱；
•我都遇过呢类婆婆，另一半让咗个位俾婆婆坐，之后行咗去车门附近，过咗好多个站之后婆婆同我讲佢下个站落车，叫返你朋友仔过嚟坐；
•婆婆劲Cute Cute（可爱）。我曾经让座俾个婆婆，佢坐咗几个站准备落车（当时都多人），佢一直企喺个位前面挥手叫我，我行到过去佢话要俾番我坐；
•试过食饭有类似情况，个阵6:00搭枱，都系同婆婆，问咗佢个位系咪无人，跟住出去攞餐，然后返嚟𠮶阵见到有个男人想坐呢个位，婆婆即刻就话：“个位已经留咗俾呢位小姐！”。
相关阅读：伤残青年坐城巴关爱座遭骂逼让座 大婶要求出示伤残证：“我点知佢跛㗎？！”热心大叔代抱不平
网民称赞楼主让座举动
还有人指“试过拎住成手嘢，得番个关爱座，都谂住企下算。唔小心同隔篱婆婆对上眼，无声默契下佢坐咗去关爱座，让咗佢个位俾我……“我够老，等我嚟啦”，真心多谢佢”。
楼主回应称“好Nice（令人愉快）嘅阿婆。我都听过朋友讲佢返完Night shift（夜更）得返半条人命，眼前有个关爱座都唔敢坐。然后有个阿婆同佢讲“你系咪好唔舒服呀？快啲过嚟坐下啦”，讲完就又去咗坐关爱座”。
也有人称赞楼主的让座举动，“个人很喜欢自动让位给长辈的人，首先一定不是忘我地玩手机，而是愿意看身边的情况而做出善良的举动，超赞”；另有人则自爆“我让完座会怕尴尬行去另一卡”。
还有网民趁机发长文，讲述让座做好事与难得怀上身孕的巧合：
“我试过让位俾阿婆，佢好开心，佢话佢之前坐地铁无人让，地铁一Chok（擢）佢整亲，所以而家用拐杖。讲完无耐，地铁无啦啦好Chok， 如果我无让位俾佢，佢一定会跌倒。之后佢好感激我，又话好彩我让位俾佢。
我不嬲有让位俾人嘅习惯，我好耐之前坐巴士屯门公路塞车，见有个女人好似好辛苦咁企住，我望望下见佢好似大肚，因为佢好瘦，正常无咁肚腩，佢个肚唔系好明显，不过我见佢好似好辛苦，我就让位俾佢，佢又系好感激咁，我见佢摸个肚，我估佢系有咗。
无几耐我自己就有咗BB，我好记得未婚前睇过医生，医生话我好难有BB，但我婚后3个月已有，可能做得好事多”。
资料来源：ilikehashbrownssss＠Threads
相关阅读：企上层拒落累停驶 巴士男赖死获大婶主动让座 网民：面皮几厚先做得出↓↓↓↓
网上今年2月热传有男子坚持企巴士上层，令巴士车长为行车安全停驶，男子“赖死”的行为，终获一名大婶主动让座，惹来网民热议。有网民在“车cam L（香港群组）”FB专页发布影片，显示当时情况如下↓↓↓↓
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
