明星棹忌做生意｜曾智華

上周娛樂版有幾段報道，皆指藝人做生意捱得很慘又或蝕到眼光光。強如「咖啡專家」陳豪，經營咖啡店也捱到標冷汗。MIRROR成員Lokman、Alton及ERROR成員阿Dee的泰國菜「泰鳩」（店名注定失敗！），也無法經營要拉閘。

香港藝人如是，荷里活大明星狄卡比奧也如是，開設的素食漢堡包店也摺埋慘蝕。同日《星島日報》娛樂頭條登出阿叻及阿倫大相，令我想起呢對「砂煲兄弟」，當年也曾在商場大展拳腳，搞過大型火鍋店，最終也是全線蒸發。

當紅自然有「飲食棍」埋身

中外明星皆如是，當紅時豬籠入水揸大量現金，當然會有各行各業「棍」埋身，最多是「飲食棍」，遊說合資做生意。

「棍」誤導明星時誘因漂亮：第一是人人要食，故食的生意歷久不衰，兼且現金收入龐大，但材料則可拖3個月數，非常有利； 第二是明星粉絲眾多，只要個個來幫襯三幾次，已月月坐爆；第三是影迷最望親近偶像，只要明星有空就到餐廳坐坐，必客似雲來；第四是明星自己也不時與老友外出晚餐，不如就「荷包兜肚」，自己生意自己做返；第五是明星有龐大宣傳效應，傳媒免費報道，慳一百幾十萬宣傳費。

通常條「棍」都會自己夾埋一份做股東，揚言瞓身去做。我認識的「中招藝人」，無不如是，對飲食業一無所知就「上船」，結果夢醒時已不見一千幾百萬。

明星飲食生意失敗永恆Pattern

首先，條「棍」睇準明星無知又忙，將一切籌備工作攬上身，然後上下其手，由攞牌到裝修買架生再到請人……瓣瓣呃得就呃；其次，「棍」在籌辦過程中賺到盤滿缽滿，然後一開張就放軟手腳，準備打退堂鼓去搵另一條「明星水魚」，刻意將餐館運作搞到一塌糊塗；之後，明星終於覺醒，原來粉絲迷佢，是迷演技及歌藝，而非水準以下的食品，要到餐館看偶像，一次起兩次止；而且，明星及朋友們也識食，餐館水準如此不堪，豈會監粗晚晚磨爛蓆？

明星飲食生意失敗，其實有個永恆Pattern。

資深傳媒人 曾智華

相關文章：舊時本書乜乜 如今已物物｜曾智華