【曾智华专栏】AI贴士得啖笑

经常有老友玩我：“碌Sir，你死啦，而家AI越来越劲，好快可以学晒你写作Style，完全取代你，大镬‘鸟’啊！”

小弟奉旨微笑不答，但个心谂：“你班友都儍嘅，咁都惊？AI学嘢，只有其形而无其神，更冇我丰富生活体验，点学？难道佢似我咁，晚晚出街蒲收料，到不同酒家食不同美食？佢又冇味蕾，点知口腔内感觉？”

人人一窝蜂神化AI，有啲癫到似“问米”咁问DeepSeek，应该炒边只股票。喂，有冇再戆居啲呀？若咁都中，呢个世界仲有人打工？

当然，更多人会使用AI贴马。小弟科技大教授老友也是马迷，将一切数据输入大电脑，然后等佢吐出每场贴士。

结果点？结果就如每张马经的例牌贴士，又或各马房练马师的“例汤”，全部大路到震。无他，大家拥有的数据一样，只能凭资料度，但跑马哪会如此机械化？简单，你点知练马师谂乜，畀乜策骑指示？你又点知十几位骑师个心谂乜？更重要是阵上千军万马搏斗中，变量N加N咁多，你要求准确AI预测？有冇再白痴啲？所以结论系——嘥气，不如自己个脑慢慢度，如此，中正才有满足感。

有位老友“儍B”，更完全唔信贴士、唔信度马，只凡见边场有只一倍全热门赛事，就买佢倒灶，只用一百蚊，选同场最冷五只穿Q，五穿十，等佢爆。

各家师各法，结果上周日就畀佢中正“实现梦想”搭“骏皇金”，串爆玻璃：“哈，派二万五千九百零五元，够我二百五十九场本钱！”

今晚研究“垃圾马班”，提供快活谷一千米专家“中华威威”，季初两胜加到五十分，即冚旗减分，今次三十七分执二档配田鸡，九岁老马最后一击！