【曾智华专栏】“搞笑特”恐吓债主

特朗普上台四个月，已令世界多姿多彩，新闻好睇到震，因日日睇佢点发癫。

小弟不似身边人，一提起特朗普就咬牙切齿，希望佢快啲死咁款。儍啦，佢死就万斯上，万斯乃目中无人无礼凶狠之辈，肯定世界更快爆炸。还是睇狂特日日“献丑”好玩得多。

更好玩在，无论狂特对美国、对世界作出几大破坏，点样将美国本来强调的廉洁、正义、光明、民主、自由、法治、包容、制衡、扶弱……优良传统连根拔也好，但总有“特朗普放屁也是香”的盲目狂迷出嚟解画，最喜欢指佢在“捉一盘大棋”。

小弟一听就喷饭，立即前美国总统列根上身：“唔该你用一张A4纸清楚解释，咪搞到懒复杂高深，最好连牛头角顺嫂都明。”

银行及财务机构日日忠告贷款者：“借钱梗要还，还得到先好借！”呢两句正是顺嫂都明的口号。不过，癫佬特就似乎唔多明，不单唔明，仲反客为主，身为全球最大债仔，一上场就恐吓债主。老友，若咁都得，仲成世界？

最冇志气为日本仔，身为最大债主，被债仔恰时，不单低声下气，其代表性报章《The Japan Times》，报道特朗普延迟九十日加关税，竟大字标题：Tokyo Cheers！你话你系咪黐咗线？债仔玩迟你九十日，你竟欢呼？真系唔玩残你就唔系美国佬啦。

形势发展至今，好明显，只得中美两个主角在台上玩“斗大”，各自在摸对方的底牌，各自设立底线，真是精彩刺激。

中国行Top Down制度，官员胜在纪律严明。但美国则内部充满尖锐矛盾，要令民主党及被搞到鸡毛鸭血的商界口服心服，绝冇可能。时间一日一日拖落去，最终边个先顶唔顺呢？