【曾智华专栏】究竟佢赚乜？

游贵州，每朝出发前，必定被导游提醒：“各位早晨，唔该大家一齐玩吓手机先！”入到内地，导游第一时间收晒全团人回乡证，因次次Check In酒店要用，之外，佢话最惊团友遗失证件，若如此，肯定烦到人都癫，故此全部由佢保管最安全。但手机唔得，个个客自己要用，而内里也有不少私瘾与证件，包括高铁票。所以，为免大家出发时遗留手机，故才天天要求大家开车前“玩手机”呢招。

证件、手机、药物，小弟当然紧张（钱反而冇问题，因老友大把），但其他就好易疏忽。此程带同大大本的日记簿去，因一边旅游，一边办公，安排下半年活动。日记簿黑色，咁就弊，某日Check Out酒店，冇为意，漏低咗，去到一百公里外的下个城市才发现。点搞呢？呢本日记簿对我好重要㖞，立时如热锅上的蚂蚁，惟有向内地通“班长和”求救。

我就担心到震，但和哥呢，笑笑口胸有成竹回应：“碌Sir，放心，你本珍贵日记簿，半日内会再出现，包在我身上。”

佢首先用手机Call酒店礼宾部，确认执房员工发现日记簿，然后用手机笃笃笃，通知快递公司去酒店领取，送回畀我。

讲都唔信，由落单开始，十小时内日记簿已经到手，物归原主。老友，一百公里咁远，呢种“中国速度”真系只此一家，难以想像其他城市能做到同样服务。更离奇，只收十五蚊人仔！各位，有边个可以解释畀小弟听，快递公司究竟赚乜？指派一个速递员，先到酒店取货，再安排一百公里送运，人、车、油、路费……加埋收十五蚊人仔？呢种平得惊人的服务，一旦杀入香港，惨，又唔知淘汰几多人了。