【曾智华专栏】边个会知、信、买？

周三晚沙田马场处处眼镜碎片，点解？正是“白果骑师”金诚刚，突然马神上身，由本来跑咗三十一场，半只马都唔识赢，突然唔知搞乜，出三只W三只，做埋“骑师王”。

有人事先会知、会信吗？起码马会操盘手一定唔知及唔信，否则点会“骑师王”开三十倍巨冷？

不过，睇金诚刚啲W飞，又几肯定姚本辉知，因马由佢练，并提供比金诚刚，“超加加”及“扶摇势劲”，一匹未W过，一匹则从未出赛，竟变为全场顶头热门，呢啲飞边度嚟？意即幕后人今次肥过肥仔水！

当晚惨被闹爆的，当然为“黄宝泥”，几乎只只有飞，结果只得一只大热“表之多多”跑第二，其他统统瓜直。

我又如何？当然重伤，因本估计田鸡会开饭，点知佢使出“软硬鞭”最擅长的魂游马场大法，场场出，骑九只，结果又冇W又冇Q，相信部分投注者似我一样，嬲到㓥田鸡消夜。

明天跑沙田，潘顿复出，不少人当然庆幸有返条“扶手棍”，应有Sure Win的“嘉应高升”出战。但兵不厌诈，当个个都以为“软硬鞭”会饿马开“硬”时，佢可能就同大鳄布文玩移形换影，再间中醒只畀乡里“儍仔新”爆冷㗎。

二级“短途锦标”又再来次“既生瑜，何生亮”，“骄阳明驹”无奈又遇上“嘉应高升”！今季出五次，四Q一P，就是无法出头，点搞？是否应考虑避一避克星，改向长途发展？

前马王“加州星球”试闸显示，全面复勇，弹离胜出，呢场买“乜重彩”都要预佢一票！

“主席锦标”出赛马评分极接近，最低分的“阳光勇士”尤擅此程，两W两P未甩过，我会W、P共投，廿蚊鸡睇有冇得嗌。