【曾智華專欄】陳振江100分演出

陳振江是誰？稍後開估！

多年來，遇到N咁多人問：「碌Sir，點解凡跟你去食的，皆零舍好味嘅呢？」

每當有此問題，若有幾位在座的，必有人叻唔切話：「梗係啦，佢有地盤吖嘛！」

「叻唔切」啱唔啱？最多三分一。事實，香港哎吔有個「地盤」（專欄、電台、電視、網台……）者，多如天上繁星，咁佢哋又會否經常食到廚師的最高功力呢？

又例如不少財大氣粗者，經常以為有錢大曬，我有乜食唔到？啱唔啱？呢次，最多啱五分一。因人乃情緒動物，尤其殿堂廚師，個個藝術家，你串串貢用錢撻佢，真係睬你都儍。

咁應該點？最基本，由時時幫襯做熟客開始，爭取與樓面經理及廚房阿頭以尊重及欣賞態度交朋友（當然鎖死出色食肆才出手，絕非三九唔識七都做）。然後，好的，在傳媒上表揚，當然要闊綽一點，貼士鬆手少少，如此，就可以開始有不同的服務與廚工享受嘞。

以上只是基本，另要配合客觀形勢。乜叫客觀形勢？以下幾點：一、勿在繁忙日子幫襯，避開五六日，因大廚做到踢曬腳時，哪有時間心情輕挑慢撚，將細節處理得妥妥當當？二、最好星期一幫襯。因五六日餐館雪櫃多會清倉，新鮮貨周一重新補充，材料正好多。三、避開周三及大廚休息日，廚師多愛投注賽馬，周三跑夜馬，極有可能心不在焉；大廚每星期也會休息一至兩日，又或放大假，呢啲日子千祈咪去，因高手低手功力可以差好遠㗎！

剛周一「快樂傳媒老是佛」喜萬年酒樓聚餐，我一個月前已向負責人梁經理確認大廚陳振江當值，懇請兩位炮製示範級菜式。

結果掂過碌蔗，食出100分！