【曾智华专栏】病人的“震撼帐单”

消委会早前发表报告，指私营医疗机构的收费，透明度仍然不足，建议政府“做嘢”，意即再唔监管唔掂。等我补多两句啦，其实如今私营医疗加保险集团有意无意的联合“掠水大行动”，已变计时炸弹！

私营医疗收费，素来是个黑洞，病人入院前，根本无从估计“失血情况”。但医院为保障自己，若你冇保险，几大先收“未来钱”。而这笔“未来钱”，必须多到院方肯定足够支付未来的费用，否则，就会要求你预支再预支。

N年前先父入院治疗，起初不想霸占公用医疗资源，觉得咬咬牙也可能负担得起，决定入住私家医院。此乃佢第一次，也是最后一次。小弟每隔几日找数，吓到标冷汗，正正有如今日标题的“震撼帐单”，不单止超劲肉赤（当年冇医保），兼且畀畀吓真的开始担心破产，唯有硬着头皮向医生表白。

私家医生倒也惯咗面对呢种病人畀到干塘现象，咁点？一二三Call白车，转公家医院，结果送咗去广华医院，住到离世。

如今到我呢代，为免要在公家医院瞓冷巷，又或有要求时叫天不应、叫地不闻（真实惨况），惟有买个人医保。不过，又发觉这也是个无底深潭。我买咗四年，一个仙未Claim过（但愿一世如此），但保险公司可以不用再咨询我，就年年随意加价，加幅恍如任定（乱嚟），然后自动过数。

我绝对知保险是玩集体“资金池”，边个需要边个攞，唔够就系大围事，又再加价。

但条气唔顺，正是现今仍冇官方监管私营服务乱收费。尤其个别医生一旦知道病人有保险，立时大刀斩落。呢个情况，若冇公开公平方式去规管，迟早会爆煲，只是未知点爆法。