【曾智华专栏】特朗普怪鸡关税逻辑

特朗普日日霸住全球新闻时间，越讲越High，越讲越无逻辑。难得佢国内百万知识分子，冇乜对等力量可以踢爆佢。加上丁友完全知道自己的“魅力”，你班新闻界唔听佢点，佢就唔畀你采访，一手摧毁新闻自由也做得出，历史必定审判佢！

不过，世事讲平衡，一个人去到只手遮天乱搞一通，点会冇后果，否则呢个就唔系世界啦。广东话有句：咁仲成世界？好有深义㗎。

昨晚与一群智者开局，当中有经济系大教授A，佢曾在美国长春藤大学执教多年，也觉得狂特不可思议：“条友一日乱噏无为，一时讲A，一时讲B，一时又打倒昨日的我。堂堂超级大国，竟唔见有人兜棍扑醒佢，完全违反美国传统价值观。条友吹得就吹，例如吹到上天的关税，竟话此乃世界最美丽的东西，哈，究竟美国班经济学者系咪死晒，完全唔识兜脚踢爆佢？”

A教授指出，狂特大加关税，理由为贸易逆差，令美国蚀底。吓？咁都讲得出？点解你与中国有逆差？因美国人大量买入中国货。点解买？一为需要，二为平。假若美国自己生产到同样质素及价钱货品，岂会买中国货？其实另一角度睇，正是美国占中国廉价劳工及原材料的“便宜”，岂可倒转讲？市场自由，有人揸支枪指住你买平嘢咩？

如今狂特加关税，入口货品立即贵咗，对美国消费者而言，左一巴是要买贵嘢，右一巴？你以为美国仍有能力生产平价日用品？儍嘅先会信！关税能制造低档次就业机会？完全是幻象！政府收多咗税，系，但等于从美国贫民中抽血，有天理吗？美国人恍如已被催眠，扎醒时，个个已唔见咗几公升血，真戆居！