【曾智华专栏】唔该快啲天热

前日与世侄“大只O”晚饭，佢乃香港健美冠军，极受欢迎的明星级健身教练。成餐饭不停口噏噏猛话：“唔该快啲天热，快啲天热！”

呢下有少少触动小弟神经，因我最最最怕天热，早年的精神系统出问题，搞到荷尔蒙分泌失常，怕冷又怕热。

冷，好易搞，着多几件衫，戴颈巾，笠冷帽，再唔系，戴手套加条亏佬裤都可以搞掂。但热呢，真弊，因被紫外光一晒，身体就起反应，不安情绪涌现。故此，踏入5月，一切日间活动全推掉，总之，早上九点半后，黄昏五点半前，只躲在家中等，等乜？等日落西山，就出外运动及晚餐。

终于早前被中医老友点醒：“碌Sir，天然嘅嘢，无法抗拒㗎，就顺住嚟行囉。我不少病人唔吹得冷气，简单，晚餐专拣冇冷气直吹位坐囉，至于似你一类也如是，应该完全避开户外工作，只选室内的。退休后更容易，5月至10月，进入‘夏眠’期，太阳一出，即躲家内搞呢搞咾。如今单单揸部手机或上影视平台，眼睛已忙到消化不良啦，记住，顺天而行呀！”

事实，我近几年正如中医老友提点的，日出而归，夜入而作，倒转嚟玩。

讲返世侄“大只O”，点解咁想快啲热？乃因佢做健身教练，呢行原来有旺淡季。淡季正是冬天，人人着到只糭咁，身形线条有几靓都冇得“晒”。夏天刚刚相反，年轻男男女女有咁少着咁少，若男的操到腹肌暴现及手瓜起𦟌大大只，会特别多异性倾慕㗎。女孩子呢，时兴穿背心Bra Top热裤或贴身瑜伽裤，若操到出现线条美，咁就真真成个人都会充满自信㗎。

就以上原因，“大只O”一到5月，就卜爆私人授课，简直猪笼入水㗎。