【曾智華專欄】唔該快啲天熱

前日與世侄「大隻O」晚飯，佢乃香港健美冠軍，極受歡迎的明星級健身教練。成餐飯不停口噏噏猛話：「唔該快啲天熱，快啲天熱！」

呢下有少少觸動小弟神經，因我最最最怕天熱，早年的精神系統出問題，搞到荷爾蒙分泌失常，怕冷又怕熱。

冷，好易搞，着多幾件衫，戴頸巾，笠冷帽，再唔係，戴手套加條虧佬褲都可以搞掂。但熱呢，真弊，因被紫外光一曬，身體就起反應，不安情緒湧現。故此，踏入5月，一切日間活動全推掉，總之，早上九點半後，黃昏五點半前，只躲在家中等，等乜？等日落西山，就出外運動及晚餐。

終於早前被中醫老友點醒：「碌Sir，天然嘅嘢，無法抗拒㗎，就順住嚟行囉。我不少病人唔吹得冷氣，簡單，晚餐專揀冇冷氣直吹位坐囉，至於似你一類也如是，應該完全避開戶外工作，只選室內的。退休後更容易，5月至10月，進入『夏眠』期，太陽一出，即躲家內搞呢搞咾。如今單單揸部手機或上影視平台，眼睛已忙到消化不良啦，記住，順天而行呀！」

事實，我近幾年正如中醫老友提點的，日出而歸，夜入而作，倒轉嚟玩。

講返世侄「大隻O」，點解咁想快啲熱？乃因佢做健身教練，呢行原來有旺淡季。淡季正是冬天，人人着到隻糭咁，身形線條有幾靚都冇得「晒」。夏天剛剛相反，年輕男男女女有咁少着咁少，若男的操到腹肌暴現及手瓜起𦟌大大隻，會特別多異性傾慕㗎。女孩子呢，時興穿背心Bra Top熱褲或貼身瑜伽褲，若操到出現線條美，咁就真真成個人都會充滿自信㗎。

就以上原因，「大隻O」一到5月，就卜爆私人授課，簡直豬籠入水㗎。